Yay meyvələrini qabığı ilə yemək təhlükəlidirmi? Qida eksperti açıqladı

Ərik, şaftalı və gavalı kimi yay meyvələrinin qabığını yemək ümumilikdə orqanizm üçün olduqca faydalı bir seçimdir. Çünki bu meyvələrin qida maddələrinin, xüsusilə də qida lifləri və antioksidantların əsas hissəsi məhz qabığında və qabığa yaxın təbəqədə cəmləşir. Liflər bağırsaqların normal fəaliyyətini dəstəkləyir, uzunmüddətli toxluq hissi yaradır və gündəlik qidalanmanın keyfiyyətini artırır. Lakin digər tərəfdən, meyvə səthində pestisid qalıqları, toz və mikroorqanizmlərin ola bilməsi müəyyən gigiyenik risklər yaradır. Buna görə də mütəxəssislər meyvələri sadəcə qorxudan soymağın düzgün olmadığını, əsas diqqətin keyfiyyətə və düzgün təmizlənməyə yönəlməli olduğunu bildirirlər.

Bu mövzu ilə bağlı suallarımızı cavablandıran qida eksperti Fərid Səfərov yay meyvələrinin qabıqlı şəkildə istehlakının incəliklərindən danışıb:

“Ərik, şaftalı və gavalı kimi meyvələrin qabığını yemək nə dərəcədə faydalıdır? Qabıqda vitamin, lif və antioksidantların daha çox olduğu bildirilir. Bununla yanaşı, meyvələrin qabığında pestisid və digər kimyəvi qalıqların qalması hansı riskləri yarada bilər və qabıqlı halda istehlakdan əvvəl necə düzgün təmizlənməlidir?

Ərik, şaftalı və gavalı kimi yay meyvələrinin qabığını yemək, ümumilikdə, faydalı seçimdir. Çünki meyvənin qida maddələrinin bir hissəsi, xüsusilə qida lifləri, polifenollar və digər antioksidant birləşmələr qabıqda və qabığa yaxın hissələrdə daha yüksək miqdarda ola bilər”.

Onun sözlərinə görə, lif bağırsaqların normal fəaliyyətinə, toxluq hissinə və qidalanmanın ümumi keyfiyyətinə müsbət təsir göstərir. Buna görə meyvənin qabığını soymaq mütləq deyil.

Lakin burada digər tərəfi də nəzərə almaq lazımdır. Meyvənin səthində pestisid qalıqları, torpaq, toz, mikroorqanizmlər və daşınma-saxlanma zamanı yaranan çirklənmələr ola bilər. Pestisidlər normativlərə uyğun istifadə edildikdə və qalıq miqdarı icazə verilən həddə olduqda risk aşağıdır.

Ekspert qeyd edib ki, amma meyvənin düzgün yuyulmaması, məhsulun mənşəyinin və becərilmə şəraitinin məlum olmaması əlavə risk yarada bilər:

“Xüsusilə uşaqlar, hamilə qadınlar və immun sistemi zəif şəxslər üçün gigiyenaya daha ciddi əməl etmək məqsədəuyğundur. Qabığı ilə yeyiləcək ərik, şaftalı və gavalını axar, təmiz su altında yaxşıca yumaq, əllərlə səthini yüngül şəkildə sürtmək lazımdır. Çürümüş və zədələnmiş hissələr kəsilməli, meyvə yuyulduqdan sonra təmiz dəsmal və ya kağız salfetlə qurudula bilər. Sabun, qab yuyucu vasitə, ağardıcı və digər kimyəvi maddələrdən istifadə etmək olmaz — onlar meyvənin səthində qala və sağlamlıq üçün əlavə risk yarada bilər. Sirkə və soda məhlullarının da pestisidləri tamamilə aradan qaldırdığına dair etibarlı zəmanət yoxdur; ən praktik üsul düzgün və bol axar su ilə yumaqdır”.

Fərid Səfərov bir məqamın da vacib olduğunu vurğulayıb:

“Meyvələri yumaq bütün pestisid qalıqlarını 100% yox etmir, xüsusilə meyvənin toxumasına nüfuz etmiş və ya sistemik pestisidlər üçün. Buna görə mümkün olduqda etibarlı mənbədən alınmış, düzgün saxlanılmış meyvələrə üstünlük vermək daha doğrudur.

Yəni meyvənin qabığını yalnız pestisid qorxusuna görə avtomatik şəkildə soymaq lazım deyil. Düzgün yuyulmuş ərik, şaftalı və gavalının qabığı həm lif, həm də bioloji aktiv maddələr baxımından qidalanmaya dəyərli töhfə verə bilər. Əsas məsələ meyvənin keyfiyyəti, mənşəyi və istehlakdan əvvəl düzgün gigiyenik təmizlənməsidir”.

Çimnaz Telmanqızı

Həmçinin oxuyun

Prezidentin bu Fərmanı nələri dəyişəcək?  — İqtisadçı DANIŞIR

Kainatın ən böyük sirli bölgələrindən biri –Nəhəng boşluqda nə var?

Son dəqiqə! Milli Məclisin bu qərarları qəbul etməsinə günlər qaldı

İlham Əliyevdən mühüm sərəncam:2027–2029-cu illərdə ...