Azərbaycan-İran münasibətlərində nisbi sakitlik hökm sürür. Sual yaranır - İranın başı özünə qarışıb?

Politoloq İlyas Hüseynov Musavat.com-a açıqlamasında bildirib ki, Azərbaycan-İran münasibətləri hazırda çox çətin dövrünü yaşayır.

Politoloq xatırladıb ki, İranda Azərbaycan səfirliyi fəaliyyət göstərmir, buna səbəb olan əsas hadisə səfirliyimizə edilən terror hücumu və diplomatlarımızın Bakıya təxliyə olunmasıdır:

“Digər tərəfdən, müxtəlif hadisələr baş verir ki, onlar da İran-Azərbaycan münasibətlərini zədələyir. Siyasi, informativ, diplomatik müstəvidə bu hadisələr bir-birini əvəzləyir. Lakin son dövrlər biz görürük ki, münasibətlərin yaxınlaşması istiqamətində tərəflər öz mövqeyini ifadə edirlər. Azərbaycan Prezidentinin köməkçisi Hikmət Hacıyevlə İranın Azərbaycandakı səfiri Seyid Abbas Musavi arasında görüş keçirildikdən sonra hər iki ölkənin XİN sözçüləri bir-birinə oxşar bəyanatlarla çıxış etdilər. Bu, münasibətləri daha da irəliyə aparmaq üçün ilkin şərtlər kimi qiymətləndirilir.

Digər tərəfdən, İranın daxilində çox ciddi ziddiyyətlər, ixtilaflar, hakimiyyət əleyhinə mitinqlər, aksiyalar baş verməkdədir. Görünür, İranın daxilindəki bu problemlər onu Azərbaycanla bir qədər ehtiyatlı davranmağa sövq edir. Eyni zamanda İranın İsraillə də çox ciddi problemləri var. Bu, İranın nüvə proqramı, uranın zənginləşdirilməsi və nüvə silahına yiyələnməyin bir addımlığında olması ilə bağlıdır. İsrail çox ciddi cəhdlə çalışır ki, İran nüvə silahına yiyələnməsin. Çünki bununla qüvvələr balansı formalaşacaq və bu, rəsmi Təl-Əvivin maraqlarına zidd mənzərə ortaya çıxaracaq.

Azərbaycan heç vaxt öz ərazilərindən İrana qarşı istifadə etməyib. Bu xüsusda bir daha Azərbaycanın mövqeyi bəyan olunub. Düşünürəm ki, İran tərəfi bunu qiymətləndirməlidir, ciddi şəkildə nəzərdən keçirməlidir. Lakin yenidən İran-Ermənistan yaxınlaşması müşahidə edilir. Hətta Ramazan bayramı ilə bağlı Ermənistan baş naziri Nikol Paşinyan İran prezidentini təbrik etdi. Təbrik məktubunda Ermənistan-İran münasibətlərinin daha da inkişaf etdirilməsinə dair niyyət öz əksini tapıb. İstənilən halda Azərbaycan regional sülhün, təhlükəsizliyin, sabitliyin əsas dəstəkçisidir və buna dair mövqeyimiz uzun illərdir ki, öz təsdiqini tapır”.