“Azərbaycanın sülh modeli dünyaya nümunə ola bilər” – Deputatdan AÇIQLAMA  

Prezident İlham Əliyevin VII Ümumdünya Mədəniyyətlərarası Dialoq Forumunun açılış mərasimindəki proqram xarakterli çıxışı müasir dövlətçilik fəlsəfəsinin, hüquqi-siyasi doktrinanın və xarici siyasətin dərin analitik mənzərəsini ortaya qoyur. Tarixi ədalətsizliklərə, otuz illik işğala və zəngin mədəni irsinin məhv edilməsinə baxmayaraq, Azərbaycanın Vətən müharibəsində qazandığı hərbi-siyasi Zəfərdən dərhal sonra qisas hissi ilə deyil, davamlı sülh təşəbbüsləri ilə çıxış etməsi nadir geosiyasi presedentdir.

BMT Təhlükəsizlik Şurasının icra olunmayan qətnamələrini öz gücü ilə reallaşdıran və suverenliyini bərpa edən ölkəmiz, hazırda Şərqlə Qərb, İslami dəyərlərlə Avropa təsisatları arasında balanslaşdırılmış çoxvektorlu diplomatiyası ilə qlobal miqyasda imtinaedilməz bir geostrateji qovşağa çevrilib. Ölkəmizin təqdim etdiyi azərbaycançılıq və multikulturalizm modeli sadəcə bir tolerantlıq bəyanatı deyil, güclü iqtisadiyyat, hərbi iradə və hüquqi ədalətin bərqərar olduğu kompleks dövlətçilik təcrübəsidir. Mövzu ilə bağlı Milli Məclisin deputatı Bəhruz Məhərrəmov Oxu24.com-a ətraflı açıqlama verib.

Milli Məclisin deputatı Bəhruz Məhərrəmov bildirib ki, Prezident İlham Əliyevin VII Ümumdünya Mədəniyyətlərarası Dialoq Forumundakı proqram xarakterli çıxışı ölkənin daxili və xarici siyasətinin, dövlətçilik fəlsəfəsinin, hüquqi-siyasi doktrinasının və tarixi təkamül prosesinin dərin analitik mənzərəsini ortaya qoyur:

“Məlumdur ki, Azərbaycan xalqı əsrlər boyu dövlətçilik ənənələrinə malik olsa da, son iki əsr ərzində müstəqillikdən məhrum edilmiş və müxtəlif siyasi sistemlərin tərkibində yaşamağa məcbur olmuşdur. Lakin tətbiq olunan xarici ideoloji və siyasi təzyiqlərə baxmayaraq, cəmiyyət öz milli hislərini, dilini, adət-ənənələrini və həyat tərzini qoruyub saxlamağı bacarmışdır”

Deputatın sözlərinə görə, ölkədə yaşayan bütün etnik və dini qrupları bir araya gətirən azərbaycançılıq ideologiyası milli birliyin üst çətirini təşkil etmiş, bu ideologiya və inklüziv cəmiyyət modeli müstəqillik tarixinin enişli-yoxuşlu dövründə, xüsusilə Ermənistanın hərbi təcavüzü və işğalçılıq siyasətinə qarşı aparılan mübarizədə, Vətən müharibəsində tam sınaqdan çıxmışdır:

“Belə bir şəraitdə Azərbaycan BMT Nizamnaməsinin 51-ci maddəsində təsbit edilmiş özünümüdafiə hüququndan istifadə edərək, 2020-ci il İkinci Qarabağ müharibəsi və 2023-cü il antiterror əməliyyatı ilə beynəlxalq hüququn tələblərini, tarixi ədaləti və öz suverenliyini təkbaşına icra etmişdir.

Postmünaqişə dövrünün siyasi xarakteristikası Azərbaycanın təkcə hərbi-siyasi Zəfər qazanan deyil, həm də sülhün və regional sabitliyin təşəbbüskarı olan strateji aktora çevrildiyini göstərir. İşğala, etnik təmizləməyə, 1 milyon insanın didərgin düşməsinə və 67 məscid daxil olmaqla bütün dini-mədəni irsin məhv edilməsinə baxmayaraq, Azərbaycanın qisas hissi ilə deyil, döyüş meydanındakı ədalətli Qələbədən sonra dərhal sülh sazişi təşəbbüsü ilə çıxış etməsi nadir geosiyasi presedentdir”.

Bəhruz Məhərrəmov qeyd edib ki, Ermənistanla sülh sazişi layihəsinin məhz Azərbaycan tərəfindən hazırlanması, müharibəni vaxtında dayandırmaq və gələcəyə baxmaq iradəsi hazırda qlobal miqyasda davam edən, sonsuz müharibələrə çevrilən digər münaqişələr üçün universal bir nümunə, dərs və həlli modeli təqdim edir. Sənədin Vaşinqtonda, Ağ Evdə ABŞ Prezidenti Donald Trampın iştirakı ilə xarici işlər nazirləri səviyyəsində paraflanması və üçtərəfli bəyannamənin möhürlənməsi Cənubi Qafqazda tamamilə yeni geostrateji reallığın beynəlxalq miqyasda qəbul olunmasının təsdiqidir.

Azərbaycanın xarici siyasət doktrinası balansı qorumaqla yanaşı, qlobal miqyasda körpü rolu oynayan unikal çoxvektorlu diplomatik şəbəkə formalaşdırmışdır.

Deputat vurğulayıb ki, ölkənin həm Çin Xalq Respublikası ilə hərtərəfli strateji tərəfdaşlıq Bəyannaməsinə, həm də Amerika Birləşmiş Ştatları ilə Strateji Xartiyaya malik olması, eyni zamanda Avropa İttifaqının 10 üzv dövləti ilə strateji tərəfdaşlıq sazişləri imzalaması onun iki super güc və Qərb institutu arasında balanslaşdırılmış, müstəqil siyasət yürütdüyünü göstərir:

“Bunlarla yanaşı, İslam Əməkdaşlıq Təşkilatının Zirvə Görüşünə ev sahibliyi etmək və təşkilata sədrlik etmək hüququ, 2028-ci ildə 50-dən çox ölkəni birləşdirən Avropa Siyasi Birliyinin Zirvə Görüşünün Bakıda keçirilməsi, Asiyada Qarşılıqlı Fəaliyyət və Etimad Tədbirləri üzrə Müşavirə təsisatında sədrliyin uzadılması və Mərkəzi Asiya Məşvərət Formatına tamhüquqlu tərəfdaş kimi dəvət olunması Azərbaycanın eyni vaxtda həm İslam dünyasının, həm Avropanın, həm də Asiyanın etibarlı mədəni və siyasi qovşağına çevrildiyini bəyan edir. İqtisadi və geostrateji aspektdən Azərbaycan xarici yardımlardan asılı olmadan, işğalın və yoxsulluğun ağır fəsadlarını dəf edərək daxili resursları və gücü hesabına yüksək inkişaf modelinə nail olmuşdur. Qlobal enerji bazarlarında etibarlı təchizatçı rolunu oynamaqla yanaşı, modern nəqliyyat-logistika infrastrukturu və dənizə çıxışı olmayan, lakin qonşularla qurulan sağlam münasibətlər hesabına Şərq-Qərb və Şimal-Cənub dəhlizlərində imtinaedilməz xəritə düyününə çevrilmək ölkənin iqtisadi təsir gücünü artırır”.

“Nəticə etibarilə, Azərbaycanın təqdim etdiyi multikulturalizm modeli sadəcə tolerantlıq çağırışı deyil, iqtisadi müstəqillik, güclü hərbi-siyasi iradə, hüquqi ədalətin bərpası və balanslı beynəlxalq diplomatiya ilə tamamlanan kompleks bir dövlətçilik təcrübəsidir”,- deyə deputat əlavə edib. 

Çimnaz Telmanqızı

Həmçinin oxuyun

Minimum əməkhaqqı artırılacaq - Bu tarixdən 

Yeməkdən sonra yuxusu gələnlər BUNU BİLMƏLİDİR -SƏBƏB

Ramiz Mehdiyevin SONU

Nazirlər Kabineti bu qərarını DƏYİŞDİ