Bizə heç kimin köməyi lazım deyil

SİYASƏT

256

03.10.2026, 19:46

Xəbərlərimizi Google-da izləyin

Yeniliklərdən dərhal xəbərdar olun

Ali Baş Komandan, Prezident İlham Əliyev oktyabrın 2-də YAP-ın Vlll Qurultayında çıxışı zamanı bir çox sahələrə toxunaraq, son zamanlar diqqət mərkəzində olan bəzi məsələlərdən də danışıb. Ölkə başçısı qeyd edib ki, " Bizə, heç kimin köməyi lazım deyil. Nə etmişik özümüz etmişik".

Bəli, Azərbaycan 30 illik işğala cəmi 44 günə son qoydu. Ərazilərini düşmən tapdağından azad etməklə, suveren, azad və ərazi bütövlüyünü təmin etmiş dövlət kimi 200 illik işğalçılıq siyasətinin də kökünü qazdı.

Vətən müharibəsində dünya hərb tarixinə nümunə olacaq şəkildə özümüz döyüşdük, millət kimi bir yumruqda, bir amal uğrunda birləşib mübarizə apardıq. Qəhrəmanlıq göstərdik. Düşmənin və onun himayədarlarının üzərinə məğrur addımlarla getdik.

Ön cəbhədə Azərbaycan əsgəri, arxa cəbhədə isə Ali Baş Komandan kimi dövlət başçısı döyüşdü. Əsgərimiz döyüş meydanında, Prezidentimiz isə informasiya savaşında nəhəng qüvvələrlə mübarizə apardı.

Bütün qüvvəmizlə səfərbər olub, Xalq-Dövlət birliyinin, vəhdətinin gücü ilə Zəfərimizi qazandıq. Ölkəmizi 20 faizi ərazisi işğal edilmiş, bir milyon qaçqını olan dövlətdən, Qalib dövlətə çevirdik. Bütün bunlar, öz daxili gücümüz və potensialımız hesabına əldə olundu.

Biz Ermənistan kimi kölgə siyasətinə sığınıb, kimlərdənsə mədət ummadıq. Silah dilənmədik. Yazıq görkəmi alıb, kimlərinsə yardımına göz dikmədik. İanəmiz bitəndə isə "asta qaçan namərddir" deyib, döyüş meydanını tərk etmədik. 11 min fərarisi olan Ermənistan ordusunun qarşısında son damla qanımıza kimi döyüşdük. Bir nəfər əsgərimiz döyüş meydanını tərk etmədi. Ürəyində Vətən eşqi yalnız irəli getdi. Haqqı olanı əldə etdi.

Nə etdik, öz qüvvəmiz hesabına əldə etdik.

Bu gün də Azərbaycan işğal azad edilmiş ərazilərdə təmir-bərpa işlərini öz gücü hesabına aparır. Düşmən tərəfindən dağıdılıb, viranə qoyulmuş şəhər və kəndlər yenidən tikilib, qurulur. İnsanlar 30 ildən sonra doğma ocaqlarına, ata-baba yurdlarına qayıdırlar. Köhnə ünvanlar yeni üslubda və tərzdə inşa edilib, sakinlərin ixtiyarına verilir. Daha müasir və modern bir bölgə yaradılır. İndi Qarabağ və Şərhi Zəngəzur bölgəsi həm də hava məkanını bütün dünyanın üzünə açıb.

Qələbədən ötən altı il müddətində heç bir ölkə deyə bilməz ki, Azərbaycana hər hansı şəkildə yardım göstərib. Doğrudur, bəzi dost dövlətlər Qarabağda məktəb və digər təhsil mərkəzləri inşa edib. Azərbaycan 44 günlük Vətən müharibəsində olduğu kimi, bu gün də bölgənin dirçəldilməsində, tikilib, yenidən qurulmasında yalnız öz gücünə və iqtisadi imkanlarına arxalanır.

Ramidə Yaqubqızı