"Yeni Azərbaycan Partiyasının qarşısında da yeni dövrün tələblərinə uyğun fəaliyyət göstərmək vəzifəsi dayanır"

Siyasi təşkilatların taleyi bəzən qəbul olunmuş proqramlardan, yazılmış nizamnamələrdən əvvəl, cəmiyyətin daxilində yaranan bir ehtiyacın səssiz təzyiqi ilə həll olunur. Ölkə döngəyə girəndə, dövlət ayaq üstə durmaq üçün sütun axtaranda insanlar baxışlarını bir ünvana çevirir. Bu seçim sifarişlə, əvvəlcədən cızılmış layihə ilə olmur. Xalq onu öz yaddaşından və təcrübəsindən süzüb çıxarır.1992-ci ilin payızı Azərbaycan üçün məhz belə bir seçim payızı idi. Müstəqillik təzəcə qazanılmışdı, amma onu qorumaq, ona məzmun vermək hələ qarşıda dururdu. Ölkə cəbhədə də, daxildə də ağır sınaqlardan keçirdi, hakimiyyət boşluğu dövlətin özünü sual altına qoyurdu. Elə bir vaxtda 91 nəfər Azərbaycan ziyalısı Heydər Əliyevə müraciət etdi. 16 oktyabrda yazılan müraciətə 24 oktyabrda cavab gəldi, 21 noyabrda isə Naxçıvanda keçirilən təsis konfransında Yeni Azərbaycan Partiyası yarandı, proqram və nizamnamə qəbul olundu, Heydər Əliyev yekdilliklə sədr seçildi. Bu ardıcıllığa diqqətlə baxanda aydın olur ki, söhbət sadəcə bir partiyanın təsis edilməsindən getmir. Cəmiyyətin etimadı institusional formaya düşürdü.

Çox keçmədi ki, tarix bu etimadı sınağa çəkdi. Partiyanın yarandığı gündən cəmi altı ay sonra Heydər Əliyev xalqın israrlı tələbi ilə hakimiyyətə qayıtdı. Dünya siyasi təcrübəsində belə nümunə az tapılar: bu qədər qısa müddətdə iqtidara gələn bir siyasi qüvvə. Amma əsas məsələ sürət deyildi, əsas məsələ o dövrdə Azərbaycanın nə ilə üz-üzə olması idi. Vətəndaş qarşıdurması, parçalanma təhlükəsi, çökən dövlət institutları, itirilən torpaqlar. Ulu Öndər dövləti bu uçurumun kənarından geri qaytardı.

Atəşkəs əldə olundu, ölkədə sabitlik bərqərar edildi, dövlətçilik institutları bərpa edildi, Konstitusiya qəbul olundu, “Əsrin müqaviləsi” ilə Azərbaycanın iqtisadi gələcəyinin təməli qoyuldu. Bunların hamısı bir siyasi xəttin hissələri idi: müstəqilliyi qorumaq, milli maraqları hər şeydən üstün tutmaq, güclü dövlət qurmaq.Lakin siyasi irsin əsl sınağı onu yaradanın yanında deyil, onsuz başlayır.

Şəxsiyyət gedə bilər, xətt isə qalmalıdır. 2003-cü ildə Heydər Əliyev dünyasını dəyişəndə Azərbaycan cəmiyyəti məhz bu sualın qarşısında dayanmışdı. Cavab İlham Əliyevin simasında verildi.

O, atasından yalnız siyasi vəzifəni deyil, dövlətçilik məsuliyyətini və ideyalar sistemini qəbul etdi, həmin sistemi dəyişən dünyanın tələblərinə uyğunlaşdıraraq davam etdirdi.

Bu illərdə Azərbaycan iqtisadi cəhətdən güclənən, enerji xəritəsində söz sahibi olan, regionda təşəbbüs irəli sürən ölkəyə çevrildi. Bakı–Tbilisi–Ceyhan neft kəməri, Cənub Qaz Dəhlizi kimi layihələr Azərbaycanı enerji təhlükəsizliyi baxımından Avropa üçün etibarlı tərəfdaşa çevirdi.

Daxildə infrastruktur yeniləndi, regionlar inkişaf etdi, sosial paketlər həyata keçirildi, ordu quruculuğuna ardıcıl diqqət göstərildi. Bu siyasətin ən mühüm xüsusiyyəti isə sakit, səbirli və hesablanmış xarakter daşıması idi. Ölkə ordusunu və iqtisadiyyatını elə hazırlayırdı ki, gələcəkdə tarixi ədalətin bərpası mümkün olsun. O gün 2020-ci ilin 27 sentyabrında gəldi.

Otuz ilə yaxın davam edən işğalın, danışıqlar masasında nəticəsiz keçən illərin, beynəlxalq hüququn kağız üzərində qalan qərarlarının ardınca Azərbaycan Ordusu Vətən müharibəsinə başladı. 44 gün sürən bu müharibə təkcə cəbhədə deyil, hər evdə, hər ürəkdə gedirdi.

Ordu döyüşürdü, xalq isə arxada birləşmişdi. Prezident, Ali Baş Komandan İlham Əliyevin qətiyyəti, strateji iradəsi və xalqla ordunun vəhdəti şərəfli Zəfərlə nəticələndi. Şuşanın azad olunması, rayonlarımıza Azərbaycan bayrağının qayıtması bir xalqın otuz illik həsrətinin sonu idi. Həmin günlərdə Azərbaycan həm də sübut etdi ki, siyasi iradə, xalq birliyi və güclü ordu birləşəndə ədalət bərpa oluna bilər.

Amma bu yolun bir mərhələsi hələ tamamlanmamışdı. 2020-ci ildən sonra da Qarabağın bəzi ərazilərində qanunsuz silahlı birləşmələrin mövcudluğu, onların təxribatları suverenliyin tam bərpasına mane olurdu. 2023-cü ilin sentyabrında keçirilən antiterror tədbirləri bu məsələni də həll etdi. Cəmi 23 saat çəkən əməliyyat nəticəsində Azərbaycan öz ərazisində suverenliyini tam bərpa etdi.

Bu, həm hərbi qələbə, həm də siyasi qətiyyətin göstəricisi idi. Beləliklə, otuz ildən çox davam edən münaqişə sona çatdı və Azərbaycan ilk dəfə olaraq bütün ərazisinə tam nəzarət edən ölkə kimi yeni dövrə qədəm qoydu.Yeni Azərbaycan Partiyasının VIII qurultayı məhz bu tarixi mərhələnin fonunda keçirildi.

Partiya ilk dəfədir ki, bütün torpaqları azad olunmuş, ərazi bütövlüyü və suverenliyi tam bərpa edilmiş Azərbaycanda qurultay keçirir. Bu fakt qurultaya ayrıca məna verir: bu, yalnız keçilən yolun yekunlarını deyil, qarşıdakı dövrün prioritetlərini də müəyyənləşdirən toplantıdır. Çünki qələbə finiş xətti deyil, yeni start xəttidir. Böyük uğurun ən təhlükəli sınağı sonrakı arxayınlıqdır. Ətrafda müharibələrin getdiyi, münaqişələrin alovlandığı bir dünyada təhlükəsizlik anlayışı artıq yalnız ordunun gücü ilə ölçülmür. İdeoloji məkan, informasiya mühiti, xarici təsirlərə qarşı siyasi müstəqillik, hətta siyasi kommunikasiyanın şablondan çıxıb canlı və təsirli dil tapması da bu anlayışın tərkib hissəsinə çevrilib.

Prezident, YAP Sədri İlham Əliyevin qurultaydakı çıxışının əsas mesajı da bunu ifadə edirdi: ana xətt dəyişməz qalır. Müstəqillik, dövlətçilik, iqtisadi müstəqillik, güclü hərbi potensial və Azərbaycanın öz imkanlarına arxalanması. Bu, 1992-ci ildə Naxçıvanda başlayan yolu bu günə bağlayan məntiqdir. Heydər Əliyevin qoyduğu təməl, İlham Əliyevin həyata keçirdiyi siyasət və xalqın birliyi bir-birini tamamlayaraq Azərbaycanı bu günkü mərhələyə gətirib çıxarıb.

Mövzu ilə bağlı Milli Məclisin deputatı Mehriban Vəliyeva fikirlərini Oxu24.com saytı ilə bölüşüb.

Milli Məclisin deputatı Mehriban Vəliyeva bildirib ki, Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevin Yeni Azərbaycan Partiyasının VIII Qurultayında çıxışı ölkəmizin müasir inkişaf mərhələsinin siyasi, iqtisadi, təhlükəsizlik və xarici siyasət prioritetlərini əhatə edən mühüm konseptual çıxış kimi diqqəti cəlb edir. Qurultayın Azərbaycanın ərazi bütövlüyünün və suverenliyinin tam bərpasından sonra keçirilməsi onun siyasi əhəmiyyətini daha da artırır. Bu baxımdan çıxış yalnız Yeni Azərbaycan Partiyasının qarşıdakı fəaliyyət istiqamətlərinə deyil, bütövlükdə Azərbaycanın dövlətçilik strategiyasına, milli maraqlarının qorunmasına və yeni geosiyasi reallıqlar şəraitində qarşıda duran vəzifələrə işıq salır. 

Mehriban Vəliyevanın sözlərinə görə,Yeni Azərbaycan Partiyasının VIII Qurultayının mühüm xüsusiyyətlərindən biri onun Azərbaycanın tamamilə yeni ictimai-siyasi və geosiyasi reallıqda keçirilməsidir.

2020-ci ildə əldə edilmiş Zəfər və 2023-cü ildə ərazi bütövlüyünün və suverenliyin tam bərpası ilə nəticələnən proseslər Azərbaycanın müasir tarixində yeni mərhələnin əsasını qoyub. Beləliklə, uzun illər davam edən münaqişə artıq Azərbaycanın ərazi bütövlüyü və suverenliyi çərçivəsində öz tarixi həllini tapıb. Bu nəticə həm dövlətin uzunmüddətli siyasətinin, həm diplomatik və siyasi fəaliyyətin, həm də Azərbaycan xalqının milli həmrəyliyinin mühüm nəticəsi kimi təqdim olunur. Prezident cənab İlham Əliyevin çıxışında xüsusi vurğulanan məqamlardan biri Azərbaycanın Zəfərə aparan yolunun ardıcıl dövlətçilik siyasəti ilə bağlılığıdır. Bu kontekstdə Yeni Azərbaycan Partiyasının 1992-ci ildə təsis olunması və Ümummilli Lider Heydər Əliyevin siyasi hakimiyyətə qayıdışı Azərbaycan dövlətçiliyinin qorunması və möhkəmləndirilməsi baxımından tarixi dönüş mərhələsi kimi qiymətləndirilir. Ulu Öndərin siyasi irsinin əsasını təşkil edən müstəqillik, dövlətçilik, iqtisadi müstəqillik, güclü hərbi potensial və milli maraqlara əsaslanan xarici siyasət prinsiplərinin sonrakı dövrdə davam etdirilməsi Azərbaycanın inkişaf modelinin əsas istiqamətlərindən birinə çevrilib.

Deputat xatırladıb ki, 1990-cı illərin əvvəllərində ölkənin qarşılaşdığı ağır siyasi, iqtisadi və təhlükəsizlik problemləri fonunda dövlət institutlarının möhkəmləndirilməsi, ictimai-siyasi sabitliyin təmin edilməsi və iqtisadi inkişaf üçün zəruri bazanın yaradılması strateji əhəmiyyət daşıyırdı. Ulu Öndər Heydər Əliyevin rəhbərliyi ilə həyata keçirilən siyasət nəticəsində Azərbaycan beynəlxalq təcrid təhlükəsindən çıxaraq dünya siyasətində özünəməxsus mövqeyini formalaşdırmağa başladı. “Əsrin müqaviləsi”nin imzalanması, xarici investisiyaların cəlb edilməsi, dövlətçilik institutlarının möhkəmləndirilməsi və Azərbaycanın çoxşaxəli xarici siyasət kursunun müəyyənləşdirilməsi sonrakı inkişaf üçün mühüm zəmin yaratdı. Bu siyasətin davamlılığı Azərbaycanın 2003-cü ildən sonrakı inkişaf mərhələsində də özünü göstərdi. Ərazi bütövlüyünün və suverenliyin bərpası dövlət siyasətinin əsas strateji məqsədlərindən biri kimi müəyyənləşdirildi və uzunmüddətli, mərhələli fəaliyyət nəticəsində bu məqsədə nail olundu. 2020-ci ilin 44 günlük Vətən müharibəsində əldə edilmiş Zəfər Azərbaycanın hərbi-siyasi gücünü nümayiş etdirməklə yanaşı, regionda yeni reallıqlar formalaşdırdı. 2023-cü ilin sentyabrında Azərbaycanın suverenliyinin bütün ərazisində tam bərpa olunması isə bu prosesin mühüm yekun mərhələsi oldu. Bu tarixi nəticələrin fonunda Azərbaycanın qarşısında artıq yeni strateji vəzifələr dayanır. Prezident İlham Əliyevin qurultaydakı çıxışının mühüm istiqamətlərindən biri məhz postmünaqişə dövrünün və yeni geosiyasi reallıqların tələbləridir. 

Onun sözlərinə görə,bu mərhələdə hərbi gücün daha da artırılması, təhlükəsizliyin təmin olunması, iqtisadi dayanıqlığın möhkəmləndirilməsi, xarici siyasətin fəallığının artırılması, ideoloji təhlükəsizliyin gücləndirilməsi və Qarabağla Şərqi Zəngəzurun bərpasının davam etdirilməsi prioritet istiqamətlər kimi müəyyənləşdirilir. Müasir beynəlxalq münasibətlər sistemində təhlükəsizlik məsələlərinin kəskin aktuallaşdığı bir dövrdə hərbi potensialın gücləndirilməsi Azərbaycanın dövlət siyasətinin mühüm istiqamətlərindən biri olaraq qalır. Çıxışda bu məsələyə yalnız hərbi üstünlük kontekstində deyil, ölkənin milli təhlükəsizliyinin və sabitliyinin qorunması baxımından yanaşılır. Ətraf regionlarda davam edən münaqişələr, beynəlxalq təhlükəsizlik mexanizmlərinin səmərəliliyi ilə bağlı problemlər və qlobal geosiyasi proseslərin sürətlə dəyişməsi dövlətlərin müdafiə qabiliyyətinin yüksək səviyyədə saxlanılmasını zəruri edən amillər kimi qeyd olunur. Azərbaycanın təhlükəsizlik siyasətinin mühüm xüsusiyyətlərindən biri də hərbi güclə yanaşı, iqtisadi və texnoloji imkanların genişləndirilməsidir. Güclü iqtisadiyyat, müasir müdafiə sənayesi, sərhəd təhlükəsizliyi, texnoloji imkanlar və insan kapitalı bir-birini tamamlayan strateji elementlər kimi çıxış edir. Bu baxımdan təhlükəsizlik məsələsi yalnız hərbi sahə ilə məhdudlaşmır, dövlətin ümumi dayanıqlığını əhatə edən kompleks anlayış kimi nəzərdən keçirilir. Çıxışda ideoloji təhlükəsizlik məsələsinə xüsusi diqqət yetirilməsi də təsadüfi deyil. Müasir informasiya məkanında dezinformasiya, manipulyasiya və kiber təhdidlər dövlətlərin təhlükəsizliyinə təsir edən mühüm amillərə çevrilib. Bu şəraitdə təhsilin, media savadlılığının, milli-mənəvi dəyərlərin və vətəndaş məsuliyyətinin gücləndirilməsi mühüm əhəmiyyət daşıyır. Cəmiyyətin bilik səviyyəsi yüksəldikcə informasiya manipulyasiyalarına qarşı müqavimət imkanları da artır. Buna görə də ideoloji təhlükəsizliyin təmin edilməsində təhsil və vətənpərvərlik mühüm vasitələr kimi önə çıxır.

Millət vəkili qeyd edib ki, bu baxımdan Yeni Azərbaycan Partiyasının qarşısında da yeni dövrün tələblərinə uyğun fəaliyyət göstərmək vəzifəsi dayanır. İctimai-siyasi fəaliyyətin müasir informasiya texnologiyalarının imkanları nəzərə alınmaqla qurulması, vətəndaşlarla daha çevik kommunikasiya mexanizmlərinin formalaşdırılması, ölkədə həyata keçirilən islahatlar və inkişaf prosesləri barədə obyektiv məlumatların geniş ictimaiyyətə çatdırılması siyasi təşkilatların qarşısında duran mühüm vəzifələrdəndir. Azərbaycanın xarici siyasət strategiyası da çıxışın əsas istiqamətlərindən birini təşkil edir.

Son illərdə ölkənin müxtəlif dövlətlər və beynəlxalq təşkilatlarla çoxşaxəli əlaqələr qurması Azərbaycanın beynəlxalq münasibətlər sistemində fəal aktor kimi mövqeyinin möhkəmləndirilməsi ilə müşayiət olunur. Azərbaycanın müxtəlif geosiyasi mərkəzlərlə qarşılıqlı maraqlara əsaslanan münasibətlər qurması, regional və beynəlxalq təşəbbüslərdə iştirak etməsi, enerji və nəqliyyat layihələrində rolunun genişlənməsi ölkənin xarici siyasət imkanlarını artıran amillər sırasındadır. Azərbaycanın xarici siyasətində əsas prinsiplərdən biri milli maraqlara əsaslanan müstəqil siyasət yürütməkdir. Ölkənin müxtəlif dövlətlərlə münasibətlərində qarşılıqlı hörmət, suverenliyə və ərazi bütövlüyünə hörmət, bərabərhüquqlu əməkdaşlıq və qarşılıqlı fayda prinsipləri mühüm yer tutur. Bu yanaşma Azərbaycanın həm regional, həm də qlobal miqyasda etibarlı tərəfdaş kimi mövqeyinin möhkəmləndirilməsinə xidmət edir. Azərbaycanın beynəlxalq platformalarda artan rolu da bu siyasətin nəticələrindən biri kimi qiymətləndirilir. Ölkənin müxtəlif beynəlxalq formatlarda fəal iştirakı, çoxtərəfli əməkdaşlıq təşəbbüsləri, Türk dünyası, İslam dünyası, Mərkəzi Asiya və Avropa ilə əlaqələrin inkişaf etdirilməsi Azərbaycanın diplomatik imkanlarının genişləndiyini göstərən mühüm amillərdir. Azərbaycanın beynəlxalq münasibətlərdə körpü rolunu oynaya biləcək imkanlara malik olması xüsusilə nəqliyyat, enerji və regional əməkdaşlıq layihələrində özünü göstərir. Enerji siyasəti Azərbaycanın geosiyasi əhəmiyyətini müəyyən edən başlıca amillərdən biri olaraq qalır.

Azərbaycan uzun illər ərzində enerji resurslarının hasilatı və ixracı ilə yanaşı, enerji marşrutlarının şaxələndirilməsi və yeni əməkdaşlıq formatlarının yaradılması istiqamətində mühüm layihələr həyata keçirib. Neft və qazla yanaşı, elektrik enerjisi, neft-kimya sənayesi və bərpaolunan enerji sahəsində potensialın inkişaf etdirilməsi Azərbaycanın enerji siyasətinin daha geniş məzmun kəsb etməsinə şərait yaradır. Enerji təhlükəsizliyinin milli təhlükəsizliklə birbaşa əlaqəli olduğu müasir dövrdə Azərbaycanın Avropanın və digər tərəfdaşların enerji təminatında oynadığı rol ölkənin beynəlxalq əhəmiyyətini artıran amillərdən biridir. Bununla paralel olaraq, Azərbaycanın yaşıl enerji potensialının inkişaf etdirilməsi, xüsusilə Xəzər regionunun bərpaolunan enerji imkanlarından istifadə edilməsi gələcək enerji strategiyasının mühüm istiqamətlərindən biri kimi nəzərdən keçirilir. Nəqliyyat və logistika sahəsində həyata keçirilən layihələr də Azərbaycanın geoiqtisadi əhəmiyyətini artırır. Orta Dəhliz və Şimal-Cənub nəqliyyat dəhlizi çərçivəsində yaradılan infrastruktur Azərbaycanın Şərqlə Qərb, Şimalla Cənub arasında mühüm tranzit bağlantılarından birinə çevrilməsi üçün imkanlar yaradır. Tranzit yüklərin həcminin artırılması, logistika infrastrukturunun inkişaf etdirilməsi və gömrük prosedurlarının təkmilləşdirilməsi ölkənin qeyri-neft sektorunun inkişafına və yeni iş yerlərinin yaradılmasına əlavə imkanlar verə bilər.

İqtisadi siyasət baxımından isə əsas hədəflərdən biri makroiqtisadi və maliyyə sabitliyinin qorunması, investisiya mühitinin daha da yaxşılaşdırılması və qeyri-neft sektorunun inkişaf etdirilməsidir. Xarici investisiyaların cəlb edilməsi Azərbaycanın iqtisadi potensialının genişləndirilməsi baxımından mühüm əhəmiyyət daşıyır. Bu istiqamətdə investisiya forumlarının keçirilməsi, beynəlxalq maliyyə və investisiya qurumları ilə əməkdaşlığın genişləndirilməsi Azərbaycanın iqtisadi imkanlarının beynəlxalq səviyyədə təqdim olunmasına xidmət edir.

M. Vəliyeva əlavə edib ki, İqtisadi inkişafın sosial nəticələri də dövlət siyasətinin mühüm istiqamətidir. Əhalinin gəlirlərinin artırılması, əməkhaqqı və pensiyaların yüksəldilməsi, sosial müdafiə mexanizmlərinin gücləndirilməsi iqtisadi artımın və maliyyə imkanlarının vətəndaşların rifahına transformasiya olunmasının əsas istiqamətlərindəndir. Bu baxımdan sosial siyasət iqtisadi siyasətdən ayrı deyil, onun mühüm nəticə və məqsədlərindən biri kimi çıxış edir.

Qarabağ və Şərqi Zəngəzurun bərpası isə Azərbaycanın qarşıdakı illərdə əsas strateji prioritetlərindən biri olaraq qalacaq. İşğaldan azad edilmiş ərazilərdə yaşayış məntəqələrinin salınması, infrastrukturun yenidən qurulması, nəqliyyat və enerji sistemlərinin yaradılması, məktəb və səhiyyə obyektlərinin tikilməsi, məşğulluq imkanlarının genişləndirilməsi və keçmiş məcburi köçkünlərin öz doğma yurdlarına qayıdışının təmin olunması Böyük Qayıdış proqramının əsas istiqamətlərini təşkil edir. Bu proses yalnız fiziki infrastrukturun qurulması ilə məhdudlaşmır. Qarabağ və Şərqi Zəngəzurda yeni iqtisadi modelin formalaşdırılması, investisiyaların cəlb olunması, müasir şəhərsalma prinsiplərinin tətbiqi, rəqəmsal və yaşıl texnologiyalardan istifadə həmin ərazilərin ölkənin ümumi inkişaf sisteminə inteqrasiyasını sürətləndirə bilər.

Böyük Qayıdışın davam etdirilməsi həm sosial, həm iqtisadi, həm də demoqrafik baxımdan uzunmüddətli əhəmiyyət daşıyan dövlət layihəsidir. Yeni Azərbaycan Partiyasının VIII Qurultayında səsləndirilən fikirlər bütövlükdə Azərbaycanın yeni inkişaf mərhələsində qarşıya qoyulan vəzifələrin geniş siyasi mənzərəsini ortaya qoyur. Ərazi bütövlüyünün və suverenliyin bərpası tarixi mərhələnin yekunu olmaqla yanaşı, yeni strateji məqsədlər üçün başlanğıc nöqtəsidir. Qarşıdakı dövrdə əsas məsələ əldə edilmiş nəticələrin qorunması, dövlətin iqtisadi və hərbi gücünün artırılması, insan kapitalının inkişaf etdirilməsi, beynəlxalq mövqelərin daha da möhkəmləndirilməsi və cəmiyyətin rifahının yüksəldilməsidir. Prezident cənab İlham Əliyevin çıxışında xüsusi vurğulanan əsas məqam ondan ibarətdir ki, müasir Azərbaycanın inkişafı yalnız keçmiş nailiyyətlərin qorunması ilə deyil, dəyişən dünya reallıqlarına uyğun yeni strateji yanaşmaların formalaşdırılması ilə davam etdirilməlidir. Bu isə dövlətçilik siyasətinin ardıcıllığını, milli maraqların prioritetliyini, müstəqil xarici siyasəti, güclü iqtisadiyyatı və təhlükəsizliyin təmin olunmasını bir-biri ilə əlaqəli vahid strategiya çərçivəsində nəzərdən keçirməyi tələb edir. Yeni mərhələdə Azərbaycanın qarşısında duran vəzifələr daha geniş miqyaslı və çoxşaxəlidir. Güclü dövlət, dayanıqlı iqtisadiyyat, müasir ordu, inkişaf etmiş insan kapitalı, fəal diplomatiya və milli həmrəylik bu strategiyanın bir-birini tamamlayan əsas dayaqlarıdır.

Deputat qeyd edib ki, VIII Qurultayda səsləndirilən mesajlar da məhz bu ardıcıllığın və strateji baxışın gələcək illərdə davam etdiriləcəyini göstərir. Azərbaycanın müasir tarixində əldə olunan nəticələr dövlətçilik institutlarının möhkəmləndirilməsi, milli iradənin siyasi qərarlarda ifadə olunması və uzunmüddətli strategiyanın ardıcıl həyata keçirilməsi ilə bağlıdır. Qarşıdakı dövrdə əsas məqsəd isə bu siyasi və iqtisadi potensialı yeni inkişaf mərhələsinin tələblərinə uyğun şəkildə daha da gücləndirmək, Azərbaycanın təhlükəsizliyini, suverenliyini və davamlı inkişafını təmin etməkdir. Bu baxımdan Yeni Azərbaycan Partiyasının VIII Qurultayı yalnız partiyanın növbəti fəaliyyət mərhələsini müəyyənləşdirən siyasi tədbir deyil, həm də Azərbaycanın yeni geosiyasi və sosial-iqtisadi reallıqlar şəraitində qarşıya qoyduğu strateji hədəflərin ifadəsi kimi xüsusi əhəmiyyət daşıyır.

Həmçinin oxuyun

İranın ilan sifəti —  Rezainin Mustafayevlə salamlaşmasının arxasında duran SƏBƏB

Misir Mərdanov “Şərəf” ordeni ilə təltif olunmasından danışdı  

Ermənistan Azərbaycan əsgəri barəsində QƏRAR VERDİ

YAP-ın İdarə Heyətindən çıxarılan 5 nəfər KİMDİR?