"Yeni Azərbaycan Partiyasının yaradılması Azərbaycanın müasir siyasi tarixinin mühüm hadisələrindən biridir"

Siyasi təşkilatların taleyi bəzən qəbul olunmuş proqramlardan, yazılmış nizamnamələrdən əvvəl, cəmiyyətin daxilində yaranan bir ehtiyacın səssiz təzyiqi ilə həll olunur. Ölkə döngəyə girəndə, dövlət ayaq üstə durmaq üçün sütun axtaranda insanlar baxışlarını bir ünvana çevirir. Bu seçim sifarişlə, əvvəlcədən cızılmış layihə ilə olmur. Xalq onu öz yaddaşından və təcrübəsindən süzüb çıxarır.1992-ci ilin payızı Azərbaycan üçün məhz belə bir seçim payızı idi. Müstəqillik təzəcə qazanılmışdı, amma onu qorumaq, ona məzmun vermək hələ qarşıda dururdu. Ölkə cəbhədə də, daxildə də ağır sınaqlardan keçirdi, hakimiyyət boşluğu dövlətin özünü sual altına qoyurdu. Elə bir vaxtda 91 nəfər Azərbaycan ziyalısı Heydər Əliyevə müraciət etdi. 16 oktyabrda yazılan müraciətə 24 oktyabrda cavab gəldi, 21 noyabrda isə Naxçıvanda keçirilən təsis konfransında Yeni Azərbaycan Partiyası yarandı, proqram və nizamnamə qəbul olundu, Heydər Əliyev yekdilliklə sədr seçildi. Bu ardıcıllığa diqqətlə baxanda aydın olur ki, söhbət sadəcə bir partiyanın təsis edilməsindən getmir. Cəmiyyətin etimadı institusional formaya düşürdü.

Çox keçmədi ki, tarix bu etimadı sınağa çəkdi. Partiyanın yarandığı gündən cəmi altı ay sonra Heydər Əliyev xalqın israrlı tələbi ilə hakimiyyətə qayıtdı. Dünya siyasi təcrübəsində belə nümunə az tapılar: bu qədər qısa müddətdə iqtidara gələn bir siyasi qüvvə. Amma əsas məsələ sürət deyildi, əsas məsələ o dövrdə Azərbaycanın nə ilə üz-üzə olması idi. Vətəndaş qarşıdurması, parçalanma təhlükəsi, çökən dövlət institutları, itirilən torpaqlar. Ulu Öndər dövləti bu uçurumun kənarından geri qaytardı.

Atəşkəs əldə olundu, ölkədə sabitlik bərqərar edildi, dövlətçilik institutları bərpa edildi, Konstitusiya qəbul olundu, “Əsrin müqaviləsi” ilə Azərbaycanın iqtisadi gələcəyinin təməli qoyuldu. Bunların hamısı bir siyasi xəttin hissələri idi: müstəqilliyi qorumaq, milli maraqları hər şeydən üstün tutmaq, güclü dövlət qurmaq.Lakin siyasi irsin əsl sınağı onu yaradanın yanında deyil, onsuz başlayır.

Şəxsiyyət gedə bilər, xətt isə qalmalıdır. 2003-cü ildə Heydər Əliyev dünyasını dəyişəndə Azərbaycan cəmiyyəti məhz bu sualın qarşısında dayanmışdı. Cavab İlham Əliyevin simasında verildi.

O, atasından yalnız siyasi vəzifəni deyil, dövlətçilik məsuliyyətini və ideyalar sistemini qəbul etdi, həmin sistemi dəyişən dünyanın tələblərinə uyğunlaşdıraraq davam etdirdi.

Bu illərdə Azərbaycan iqtisadi cəhətdən güclənən, enerji xəritəsində söz sahibi olan, regionda təşəbbüs irəli sürən ölkəyə çevrildi. Bakı–Tbilisi–Ceyhan neft kəməri, Cənub Qaz Dəhlizi kimi layihələr Azərbaycanı enerji təhlükəsizliyi baxımından Avropa üçün etibarlı tərəfdaşa çevirdi.

Daxildə infrastruktur yeniləndi, regionlar inkişaf etdi, sosial paketlər həyata keçirildi, ordu quruculuğuna ardıcıl diqqət göstərildi. Bu siyasətin ən mühüm xüsusiyyəti isə sakit, səbirli və hesablanmış xarakter daşıması idi. Ölkə ordusunu və iqtisadiyyatını elə hazırlayırdı ki, gələcəkdə tarixi ədalətin bərpası mümkün olsun. O gün 2020-ci ilin 27 sentyabrında gəldi.

Otuz ilə yaxın davam edən işğalın, danışıqlar masasında nəticəsiz keçən illərin, beynəlxalq hüququn kağız üzərində qalan qərarlarının ardınca Azərbaycan Ordusu Vətən müharibəsinə başladı. 44 gün sürən bu müharibə təkcə cəbhədə deyil, hər evdə, hər ürəkdə gedirdi.

Ordu döyüşürdü, xalq isə arxada birləşmişdi. Prezident, Ali Baş Komandan İlham Əliyevin qətiyyəti, strateji iradəsi və xalqla ordunun vəhdəti şərəfli Zəfərlə nəticələndi. Şuşanın azad olunması, rayonlarımıza Azərbaycan bayrağının qayıtması bir xalqın otuz illik həsrətinin sonu idi. Həmin günlərdə Azərbaycan həm də sübut etdi ki, siyasi iradə, xalq birliyi və güclü ordu birləşəndə ədalət bərpa oluna bilər.

Amma bu yolun bir mərhələsi hələ tamamlanmamışdı. 2020-ci ildən sonra da Qarabağın bəzi ərazilərində qanunsuz silahlı birləşmələrin mövcudluğu, onların təxribatları suverenliyin tam bərpasına mane olurdu. 2023-cü ilin sentyabrında keçirilən antiterror tədbirləri bu məsələni də həll etdi. Cəmi 23 saat çəkən əməliyyat nəticəsində Azərbaycan öz ərazisində suverenliyini tam bərpa etdi.

Bu, həm hərbi qələbə, həm də siyasi qətiyyətin göstəricisi idi. Beləliklə, otuz ildən çox davam edən münaqişə sona çatdı və Azərbaycan ilk dəfə olaraq bütün ərazisinə tam nəzarət edən ölkə kimi yeni dövrə qədəm qoydu.Yeni Azərbaycan Partiyasının VIII qurultayı məhz bu tarixi mərhələnin fonunda keçirildi.

Partiya ilk dəfədir ki, bütün torpaqları azad olunmuş, ərazi bütövlüyü və suverenliyi tam bərpa edilmiş Azərbaycanda qurultay keçirir. Bu fakt qurultaya ayrıca məna verir: bu, yalnız keçilən yolun yekunlarını deyil, qarşıdakı dövrün prioritetlərini də müəyyənləşdirən toplantıdır. Çünki qələbə finiş xətti deyil, yeni start xəttidir. Böyük uğurun ən təhlükəli sınağı sonrakı arxayınlıqdır. Ətrafda müharibələrin getdiyi, münaqişələrin alovlandığı bir dünyada təhlükəsizlik anlayışı artıq yalnız ordunun gücü ilə ölçülmür. İdeoloji məkan, informasiya mühiti, xarici təsirlərə qarşı siyasi müstəqillik, hətta siyasi kommunikasiyanın şablondan çıxıb canlı və təsirli dil tapması da bu anlayışın tərkib hissəsinə çevrilib.

Prezident, YAP Sədri İlham Əliyevin qurultaydakı çıxışının əsas mesajı da bunu ifadə edirdi: ana xətt dəyişməz qalır. Müstəqillik, dövlətçilik, iqtisadi müstəqillik, güclü hərbi potensial və Azərbaycanın öz imkanlarına arxalanması. Bu, 1992-ci ildə Naxçıvanda başlayan yolu bu günə bağlayan məntiqdir. Heydər Əliyevin qoyduğu təməl, İlham Əliyevin həyata keçirdiyi siyasət və xalqın birliyi bir-birini tamamlayaraq Azərbaycanı bu günkü mərhələyə gətirib çıxarıb.

Mövzu ilə bağlı Milli Məclisin deputatı Aydın Mirzəzadə fikirlərini Oxu24.com saytı ilə bölüşüb.

Milli Məclisin deputatı Aydın Mirzəzadə bildirib ki, dövlət başçısının çıxışı məzmunu, analitik yanaşması, gündəmdə olan məsələlərə düzgün qiymət verməsi, eləcə də Azərbaycanın qarşısında duran əsas vəzifələri dəqiq müəyyənləşdirməsi baxımından diqqət çəkib.

Aydın Mirzəzadə qeyd edib ki, Prezident İlham Əliyev Azərbaycan tarixini dərindən bilir, ölkənin müəyyən dövrlərdə üzləşdiyi uğursuzluqların səbəblərini düzgün təhlil edir və gələcək inkişaf üçün əsas istiqamətləri müəyyənləşdirir:

“Görünən odur ki, liderimiz Azərbaycan tarixini yaxşı bilir. O, müəyyən dövrlərdə yaşadığımız uğursuzluqların səbəblərini düzgün müəyyənləşdirir və bundan irəli gələrək, Azərbaycanın bundan sonrakı inkişafının hansı istiqamətlərə söykənəcəyini müəyyən edir. Prezident bu yanaşmasını bu gün cəmiyyətlə bölüşür”.

Deputat Azərbaycanın əldə etdiyi uğurlarda dövlətçilik ənənələrinin və ardıcıl siyasi kursun mühüm rol oynadığını vurğulayıb. Onun sözlərinə görə, bu baxımdan Yeni Azərbaycan Partiyasının yaradılması Azərbaycanın müasir siyasi tarixinin mühüm hadisələrindən biridir.

“Yeni Azərbaycan Partiyasının yaranması ölkəmizin müstəqilliyinin ilk illərində ciddi siyasi və ictimai proseslərin getdiyi bir dövrə təsadüf edir. O zaman Azərbaycanın müxtəlif bölgələrindən olan ziyalılar və ictimaiyyət nümayəndələri ölkənin qarşısında duran problemlərin həllində Heydər Əliyevin siyasi təcrübəsinə və liderlik imkanlarına böyük ümid bəsləyirdilər. 1992-ci ildə Yeni Azərbaycan Partiyasının yaradılması və Heydər Əliyevin partiyanın sədri seçilməsi Azərbaycan siyasi həyatında yeni mərhələnin başlanğıcı oldu”.

Aydın Mirzəzadə bildirib ki, Heydər Əliyevin siyasi fəaliyyəti yalnız YAP-ın formalaşması ilə məhdudlaşmayıb, onun rəhbərliyi ilə Azərbaycanda dövlətçilik institutlarının möhkəmləndirilməsi, siyasi sabitliyin təmin olunması və ölkənin inkişaf strategiyasının müəyyənləşdirilməsi istiqamətində mühüm addımlar atılıb.

“Heydər Əliyevin müəyyən etdiyi siyasi xətt sonrakı dövrdə də Azərbaycanın inkişafının əsas istiqamətlərindən birinə çevrildi. Bu gün Prezident İlham Əliyevin rəhbərliyi ilə həmin siyasi kurs müasir dövrün tələblərinə uyğun şəkildə davam etdirilir. Ölkəmizin ərazi bütövlüyünün və suverenliyinin təmin olunması, beynəlxalq nüfuzunun artması, iqtisadi inkişaf və insanların rifahının yüksəldilməsi bu siyasətin nəticələridir”.

Deputatın sözlərinə görə, cəmiyyət Prezident İlham Əliyevin rəhbərliyi ilə həyata keçirilən siyasətin nəticələrini görür və Azərbaycanın maraqlarının hər zaman yüksək səviyyədə qorunduğunun fərqindədir.

“Azərbaycan ərazi bütövlüyünü təmin edib. Bu gün ölkəmiz dünya birliyində yüksək nüfuza malikdir. İnsanlarımızın firavanlığı və təhlükəsizliyi Azərbaycan iqtidarı üçün vacib məsələlərdəndir”.

Aydın Mirzəzadə Yeni Azərbaycan Partiyasının da bu siyasətin həyata keçirilməsində mühüm rol oynadığını qeyd edib:“Yeni Azərbaycan Partiyası bu məsələlərin həyata keçirilməsində böyük rol oynayır. Parlamentdə çoxluğa malik siyasi təşkilat, bələdiyyələrdə isə əsas siyasi qüvvə kimi Yeni Azərbaycan Partiyası bu gün cəmiyyətin etimadını doğrultmağa çalışır və buna nail olur. Çünki seçilən yol düzgündür”.

Deputat əlavə edib ki, Heydər Əliyevin yaratdığı siyasi məktəb və müəyyən etdiyi dövlətçilik prinsipləri bu gün də Azərbaycanın inkişafında mühüm rol oynayır.

“Lider üzərinə düşən vəzifəni yüksək səviyyədə həyata keçirir. Heydər Əliyevin müəyyən etdiyi dövlətçilik ənənələri və siyasi kurs bu gün Prezident İlham Əliyev tərəfindən uğurla davam etdirilir. Bundan sonra da Azərbaycanın uğurlu nəticələr əldə etməsi üçün bütün imkanlar var”.

Turan Etibaroğlu

Həmçinin oxuyun

Yol nişanını görməyən sürücü cərimədən azad edilə bilərmi? – AÇIQLAMA  

Nazirlikdən pensiyalarla bağlı RƏSMİ AÇIQLAMA 

Məktəbdə şagird özünü necə aparmalıdır? Fəlsəfə doktoru ilə MÜZAKİRƏ

Sürücülərin DİQQƏTİNƏ! Bunu səhvi etsəniz,avtomobilin mühərriyi sıradan çıxacaq