Nazir: Azərbaycan-Türkiyə enerji əməkdaşlığı Avropanın enerji təhlükəsizliyinə böyük töhfə verir 

Azərbaycan və Türkiyə arasında enerji sahəsində əməkdaşlıq təkcə iki ölkə üçün deyil, daha geniş region və Avropanın enerji təhlükəsizliyi baxımından mühüm əhəmiyyət daşıyır.

Oxu24.com  xəbər verir ki, bunu energetika naziri Pərviz Şahbazov Azərbaycan-Türkiyə 5-ci Enerji Forumunun yekunlarına dair çıxışı zamanı bildirib.

Nazir qeyd edib ki, Türkiyənin energetika və təbii sərvətlər naziri Alparslan Bayraktar forumda iştirak etmək üçün Türkiyənin enerji sektorunu geniş şəkildə təmsil edən böyük nümayəndə heyəti ilə Bakıya səfər edib.

Pərviz Şahbazov deyib ki, Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğanın siyasi iradəsi nəticəsində iki ölkə arasında münasibətlər son illərdə daha da güclənib, Şuşa Bəyannaməsinin imzalanması ilə bu münasibətlər strateji müttəfiqlik xarakteri alıb.

Onun sözlərinə görə, Şuşa Bəyannaməsində də enerji əməkdaşlığı Azərbaycan-Türkiyə münasibətlərinin mühüm istiqamətlərindən biri kimi müəyyən edilib və bu sahədə əməkdaşlıq bundan sonra da davam etdiriləcək.

Nazir vurğulayıb ki, Bakı-Tbilisi-Ceyhan, Bakı-Tbilisi-Ərzurum, TANAP və STAR kimi iri enerji layihələri yalnız Azərbaycan və Türkiyənin maraqlarına deyil, daha geniş regionun, eləcə də qlobal enerji bazarının iştirakçılarının maraqlarına xidmət edir.

“Azərbaycan və Türkiyənin enerji əməkdaşlığı, xüsusilə Türkiyə üzərindən həyata keçirilən enerji tədarükləri Avropa İttifaqının enerji təhlükəsizliyinə böyük töhfə verir”, – Pərviz Şahbazov bildirib.

O qeyd edib ki, Azərbaycanın enerji resursları Türkiyə üzərindən dünya bazarlarına çıxarılır və bu, həm neft, həm də təbii qaz tədarüklərinə aiddir.

Pərviz Şahbazovun sözlərinə görə, son illərdə Azərbaycan artıq 16 ölkəyə təbii qaz tədarükü həyata keçirib. Nazir əlavə edib ki, bu göstəricilər Azərbaycan-Türkiyə enerji əməkdaşlığının miqyasının genişləndiyini və iki ölkənin regional və qlobal enerji təhlükəsizliyində rolunun artdığını göstərir.

Həmçinin oxuyun

Məhkəmə Afət Fərmanqızına qadağa qoydu   

Taksi qiymətlərində BAHALAŞMA: Təbii bazar reaksiyası, yoxsa süni qiymət siyasəti?  

Azərbaycanda yeni idarə yaradıldı:Rəisi kimdir? +FOTO

Sürücülərin diqqətinə!Bu yolda dəyişiklik: 100 manat+2 bal cəriməsi var