"Bravo"da baş vermiş cinayətin səsli videosu yayıldı - DETALLAR

Bakının Xətai rayonunda martın 4-də hipermarketdə baş verən silahlı insidentlə bağlı bəzi gizli məqamlar açıqlanıb.

Bununla bağlı Baku TV-yə həmin hadisəni araşdıran əməliyyatçı danışıb.

O bildirib ki, hadisədən 5 dəqiqə sonra ticarət obyektinin mühafizə siqnalizasiya sistemindən həyəcan düyməsi sıxılıb, təqribən 2 dəqiqə 30 saniyədən sonra mühafizə polisinin əməkdaşları, bir qədər sonra isə polisin əməliyyat qrupları hadisə yerinə gəliblər:

“Cinayət hadisəsi üzrə tərtib edilən əməliyyat planları icraya yönəldilib. Əməliyyat planlarına əsasən, Daxili İşlər Nazirliyinin aidiyyəti qüvvələri koordinasiyalı şəkildə cinayətin isti izlərlə açılması və cinayəti törətmiş şəxslərin yaxalanması istiqamətində tədbirlərə başlayıb”.

Əməliyyatçı xatırladıb ki, cinayətin açılması ilə bağlı həyata keçirilən kompleks tədbirlərin məzmunu məxfi olduğundan açıqlana bilməz:

“Lakin deyə bilərəm ki, operativ qaydada görülmüş tədbirlərlə hadisədən bir neçə saat sonra cinayətin törədilməsində şübhəli olan şəxslərin dəqiq şəxsiyyətləri müəyyən edilib. Onlardan biri paytaxt ərazisində gizləndiyi ünvanda cinayətin törədilməsində istifadə olunan silahla birlikdə yaxalanaraq istintaqa təhvil verilib. Paytaxtın mərkəzi hissəsində yerləşən mənzillərin birində gizlənən cinayətin digər iştirakçısı isə saxlanılarkən silahlı müqavimət göstərdiyi üçün qanunvericiliyin tələblərinə uyğun olaraq polis əməkdaşları tərəfindən odlu silah tətbiq edilməklə zərərsizləşdirilib. Cinayətin törədilməsində istifadə etdiyi odlu silah, eləcə də, ələ keçirilmiş pul vəsaitləri tam şəkildə aşkar edilərək götürülüb”.

Qeyd edək ki, martın 4-də günorta 12 radələrində paytaxtın Xətai rayonu ərazisində yerləşən hipermarketlərdən birində silahlı insident baş verib. Hadisə hipermarketdə yerləşən bankların birinə məxsus bankomata külli miqdarda pul yerləşdirilən zaman qeydə alınıb.

Hadisə zamanı bankın əməkdaşı Samir Şeydayev müxtəlif xəsarətlər alıb, onun mühafizəsini təşkil edən Rəqəmsal İnkişaf və Nəqliyyat Nazirliyinin əməkdaşı Rüfət Həşimov isə ölüb.