Bakıda dəhşət: Türkiyədən  gələn qadın evində öldürüldü - Qızının toyu olmuşdu

Gecə Bakıda yanğın olub. Hadisə zamanı ev sahibi 61 yaşlı qadın yanaraq ölüb. Hadisədən sonra mənzildən qadına məxsus qızıllar və pul tapılmayıb. Mərhumun həyat yoldaşı və yaxınları hadisənin qəsdən törədildiyini ehtimal edirlər. 

Oxu24.com xəbər verir  ki, Türkiyədən Bakıya qayıdan qadın yaşadığı evdə yanaraq ölüb.

Hadisə gecə saatlarında paytaxtın Qaradağ rayonu Lökbatan qəsəbəsində baş verib. Beşmərtəbəli binada yaşayan sakinlər 3-cü mərtəbədə Xuraman Həsənovanın evindən alov çıxdığını görüb dərhal yanğınsöndürənlərə məlumat veriblər. Hadisə yerinə gələn canlı qüvvə qapını qırıb mənzilə daxil olaraq alovu söndürüblər. Yanan mənzildən ev sahibi, ibtidai sinif müəlliməsi, 61 yaşlı Xuraman Həsənovanın meytini aşkar ediblər.

Mərhumun həyat yoldaşı Abbas Novruzov deyir ki, ayrı yaşadığı həyat yoldaşı ilə bir neçə gün əvvəl Türkiyəyə qızının toyuna gediblər. Ötən gün Bakıya qayıdandan sonra qadın öz, kişi də öz yaşadığı evə gedib.

Hadisə yerinə rayon hüquq-mühafizə orqanlarının əməkdaşları gəlib baxış keçiriblər. İstintaq qrupu daha sonra meyti məhkəmə tibbi-ekspertiza və patalojianatomiya birliyinə aparıblar.

Mərhumun bacısı Arzu Novruzova deyir ki, istintaq qrupu ilkin araşdırma aparıarkən onlara hadisənin elektrik xətlərində baş vermiş qısa qapanmadan olduğunu bildiriblər. Hətta ütünün elektrikdə qoşulu vəziyyətdə qaldığı belə deyilib. 

Fövqəladə Hallar Nazirliyindən verilən məlumata görə, ümumi sahəsi 72 m² olan 3 otaqlı mənzilin 1 otağının yanar konstruksiyaları 12 m² sahədə yanıb..

Bakıda mənzildə yanğın zamanı meyiti aşkarlanan 1961-ci il təvəllüdlü Həsənova Xuraman Feyzulla qızının qətlə yetirildiyi məlum olub.

Bu barədə Oxu24.com-a hüquq-mühafizə orqanlarından məlumat verilib.

Bildirilib ki, araşdırılma zamanı qadının üzərində zorakılıq əlamətləri aşkar edilib.

Faktla bağlı Qaradağ Rayon Prokurorluğunda Cinayət Məcəlləsinin 120.1-ci (Qəsdən adam öldürmə) maddəsi ilə cinayət işi başlanılıb.

(xəzərxeber)