İrəvanda keçirilən Avropa çempionatının açılış mərasimində Azərbaycan bayrağının yandırılması ilə bağlı insident səbəbindən Ermənistan ağır atletika üzrə dünya çempionatına ev sahibliyi etmək hüququndan məhrum edilə bilər.

Oxu24.com xəbər verir ki, bunu Ermənistanın təhsil, mədəniyyət və idman nazirinin müavini Karen Giloyan deyib.

Ötən gecə ağır atletika üzrə Avropa çempionatının təntənəli açılış mərasimi zamanı dizayner Aram Nikolyan Azərbaycan bayrağını bayraqdarın əlindən qopararaq yandırıb, daha sonra onunla birlikdə səhnədən qaçıb.

“Ən üzücü hal odur ki, biz az qala dünən, hətta hadisədən əvvəl 2024-cü il dünya çempionatına ev sahibliyi etmək hüququnu aldıq. Bu, bizim üçün müstəsna bir fürsət olardı”.

Giloyanın sözlərinə görə, erməni tərəfi beynəlxalq tərəfdaşlarla danışıqlar aparır və idmançıların fiziki təhlükəsizliyi ilə bağlı heç bir problemin olmadığını sübut etməyə çalışır. O, Ermənistan tərəfinin Azərbaycan idmançılarının təhlükəsizliyini təmin etdiyini, hadisənin bununla heç bir əlaqəsi olmadığını vurğulayıb.

"Biz vəziyyəti yumşaltmaq üçün hər şeyi etməyə çalışacağıq ki, nəticələr ağır olmasın" deyə Giloyan bildirib.

Eyni zamanda, nazir müavini hesab edir ki, Ermənistan Ağır Atletika Federasiyasına qarşı sərt sanksiyalar tətbiq edilməyəcək.

Tərcümə: Miri Məcidli