"Süni mayalanma zamanı mayalanma prosesinə həkim müdaxiləsi olsa da, bu o demək deyil ki, uşağın atası dəyişdirilir. Mayalanmada istifadə edilən yumurta və sperma hansı qadından və kişidən götürülübsə, elə uşaq da onlara aid olur”.

Bunu Sağlamolun.az-a uzman ginekoloq Emin Haqverdiyev deyib. 

Həkim bildirib ki, laboratoriyada qadından götürülmüş yumurtalar mikroskop altında dəyərləndirilir və uyğun olanlar seçilir. Bundan sonra seçilən yumurtalar kişidən götürülmüş spermalarla döllənir və embrion inkişafı üçün müşahidə altında saxlanılır.

Döllənmədən sonra yumurtalar süni uşaqlıq mühitiniə bənzəyən xüsusi cihazlar içərisində saxlanılır.

Günlük təqibetmə mütləqdir. Burada əsas məqsəd uşaqlığa tutunma ehtimalı ən yüksək və keyfiyyətli embrionun seçilməsidir.

Bu proseslər zamanı kişidən götürülən sperma dəyişdirilmir. Ona görə də uşağın atası dəyişmir.

Mütəxəssis qeyd edib ki, süni mayalanma ilə dünyaya gələn uşağın atası sperma nümunəsi götürülən şəxsdir. Bu birmənalı olaraq belədir.