Şirkətlər bazarda dayanıqlıqlarını qoruyub saxlamaq üçün mütləq qaydada innovasiyaların tətbiqi ilə bağlı mədəniyyət və alətlər yaratmalıdırlar.

Oxu24.com xəbər verir ki, bunu "Baku International CEO Summit"də "PAŞA Holdinq” MMC-nin Baş icraçı direktoru Cəlal Qasımov "İdarəetmədə qlobal trendlər və yeni çağırışlar" panelində deyib.

Onun sözlərinə görə, liderlər şirkətin daxilində nəyi dəyişməyin mümkünlüyünü düşünüb, tətbiq etməlidir: "İnnovasiyaları kənardan götürüb, şirkətlərin həyatına gətirməyin yollarını axtarmalıdılar. Bu, ayrı bir çağırışdır. Xarici innovasiyaların tətbiqi tam fərqli bir problemdir. İnnovasiyalar düzgün idarə edilməlidir".
C.Qasımov vurğulayıb ki, hazırda innovasiyalarla bağlı hər kəs danışır: "Bu zaman belə bir sual meydana gəlir, innovasiyalar seçimdir, yoxsa həyatın tələbidir. Bu günu on il əvvəllə müqayisə etsək görərik ki, innovasiya seçim deyil, artıq tələbdir. Səbəb budur ki, həyatın tempi çox dəyişib. Şirkətlər də cəmiyyətin bir hissəsidir. Biznes olaraq hər hansı bir məhsullar və xidmətlər bazara təklif edirik. Bazar dəyişirsə, insanların yaşam tempi və istəkləri, vərdişləri dəyişirsə, bizneslər buna uyğun dəyişə bilməyəcəksə bu zaman onlar özə fəaliyyətlərinə davam edə bilməyəcəklər və bağlanmalı olacaqlar".
O əlavə edib ki, innovasiya dəyişiklikdir, bu, böyük bir çağırışdır:"Hər hansı bir proses ağrılıdır. Dəyişiklik insanlar üçün əlavə enerjinin istifadə edilməsidir".