Yeni doğulan körpələrdən topuq testi götürülməsinə başlanıb...

OXU24.COM Xəzər TV-yə istinadən xəbər verir ki, UNICEF-in dəstəyi ilə keçirilən layihə Elmi Tədqiqat Mamalıq və Ginekologiya İnstitutu, Respublika Perinatal Mərkəzi və Sumqayıt Perinatal Mərkəzində həyata keçirilir. TƏBİB-in Ana və Uşaq Sağlamlığının Təşkili şöbəsinin məsləhətçisi Günel Məmmədova bildirib ki, bu analizlərin götürülməsində məqsəd müxtəlif irsi xəstəlikləri vaxtında aşkarlamaqdır. Neonatal müayinələr zamanı beş irsi xəstəliyin diaqnostikası aparılır.

Həkim-Genetik Həmidə Abbasova deyir ki, irsi xəstəliklər daha çox qohum nikahından doğulan körpələrdə aşkarlanır. Topuq testi isə adətən körpə doğulduqdan 3 gün sonra götürülür. 

Həkimin sözlərinə görə, xəstəliyi olan körpələrdən sözügedən analiz götürülməzsə, bu, gələcəkdə ciddi fəsadlara yol aça bilər. 

Qeyd edək ki, müayinə nəticəsində xəstəlik aşkar olunduqda həm ailəyə, həm də aidiyyatı tibb müəssisəsinə məlumat verilir.