İyunun 9-da 3 trans qadın Ombudsman Aparatının önündə etiraz ediblər. Onlar idda edirlər ki, gender kimliklərinə görə hazırda kirayə qaldıqları mənzildən çıxarılırlar. Qadınlar  iddia ediblər ki,  Nəsimi RPİ-nin 21-ci Polis Bölməsinin əməkdaşları onları döyərək evdən çıxarıblar.
Ombudsman Aparatının Ümumi şöbəsinin müdiri İbrahim Abdullayev onları qəbula dəvət edib. Şikayətçilər Ombudsman Səbinə Əliyevanın qəbuluna düşmək istəsələr də, qəbul şöbəsində ərizə yazılandan sonra yola salındıqlarını deyiblər.
Daxili İşlər Nazirliyi məsələ ilə bağlı açıqlama yayıb.

"Bəzi sosial şəbəkə seqmentlərində cinsi azlıqların təzyiqə məruz qalması ilə bağlı yayılan iddialar əsassızdır, həqiqəti əks etdirmir".

Bu barədə Daxili İşlər Nazirliyinin Mətbuat xidmətinin şöbə rəisi, polis mayoru Elşad Hacıyev bildirib.

Onun sözlərinə görə, son günlər paytaxtın Nəsimi rayonunda cinsi azlıqların kirayə götürdüyü mənzillərlə bağlı daxil olan fakt üzrə müvafiq araşdırmalar aparılır:

"Mənzil sahiblərinin və sakinlərin şikayətləri əsasında onlara məxsus evlərdən cinsi azlıqların çıxarılması ilə bağlı yaranan mübahisəli halla bağlı daxil olan fakt üzrə qanunvericiliyə uyğun müvafiq tədbirlər görülür.

Rayonun Azadlıq prospektində mənzillərdən birinin sahibi ilə kirayəşinlər arasında evdən məcburi çıxarılan zaman yaranan mübahisə zəminində sonuncunun xəsarət alması ilə bağlı müvafiq ekspertiza təyin edilib, hazırda araşdırmalar davam etdirilir. Tərəflər arasında yaranan mübahisənin xüsusatlarının araşdırılması zamanı cinsi azlıqların təhlükəsizliyi, onların hüquq və azadlıqlarının qorunması qanunvericiliyə uyğun təmin edilir".

"Qeyd olunanları nəzərə alaraq diqqətə çatdırırıq ki, tərəflərin qarşılıqlı şikayətləri əsasında aparılan araşdırmaların nəticəsindən asılı olaraq əmələ hüquqi qiymət veriləcəkdir", - şöbə rəisi bildirib.