Məktəblər, universitetlər açılıb və insan sıxlığı artıb. Belə olan halda karantin rejimi yenidən sərtləşə bilərmi? Buna ehtiyac varmı?

Məsələ ilə bağlı Azadinfo.az-a açıqlama verən millət Vəkili Cavid Osmanov bildirib ki, dünya üzrə koronovirusa yoluxanlar 110 milyonu ötüb və 2.5 milyon insan isə bu virusun qurbanı olub, lakin elə ölkələr var ki, orada alınan virusa qarşı mübarizə tədbirləri öz müsbət tərəflərini göstərir:
“O ölkələrdən biri də Azərbaycandır ki, digər tədbirlərlə yanaşı yanvar ayından vaksinasiyanı da başladıb. Bu isə gələcəkdə öz müsbət tərəflərini göstərəcək. Virusla bağlı statistik göstəricilərə baxanda 2 ay əvvəlki vəziyyətdən daha yaxşı yöndə dəyişən rəqəmlər görürük. Bu müsbət dəyişikliyə səbəb alınan tədbirlər və bu tədbirlərə əməl edən vətəndaşlar sayəsində olub.

Qeyd edim ki, sərt karantin rejimi hər keçən gün yumşaldılır, ancaq bu o demək deyil ki, virus yoxdur”.

Millət Vəkilinin sözlərinə görə, artıq son günlər biz müxtəlif Avropa ölkələri olan Polşada, Finlandiyada və digər ölkələrdə Virusun 3-cü dalğasının başlanmasını müşahidə edilir:

"Yeni mutasiyaya uğramış virusun növləri xüsusəndə Britaniya ştammı yayılır. Bu baxımdan da gələcəkdə yoluxma sayı artarsa, insan ölümü çox olarsa, karantin rejimi yenidən sərtləşdirilə bilər. Bu zaman isə Nazirlə Kabineti yanında Operativ Qərargah bu haqda müxtəlif qaydaların tətbiqi qərarını verəcək".