“Epidemioloji baxımdan vəziyyət hələ də stabil-ağırdır. Biz pik həddə çatmışıq. Ötən gün yoluxma 493 olub. Bu sadəcə üfüqi xətt deməkdir. Bizə isə lazımdır ki, aşağıya enək. Yoluxma sayında stabil düz xətt deyil, stabil enən xətt üzrə vəziyyət əldə edək”.

Bu fikirləri Səhiyyə Nazirliyi tərəfindən yaradılmış işçi qrupunun üzvü Nabil Seyidov Qazet.az-a açıqlamasında bildirib.

O qeyd edib ki, sərt karantin rejiminin uzadılmasına ehtiyac var.

“Sağalanların sayı artsa da bir neçə dəfə yoluxanlarla bərabər olub, ya da bir dəfə sağalanların sayı yoluxanların sayını üstələyib. Son 4 həftəni nəzərə alsaq, təəssüf ki, yoluxanların sayı sağalanlardan daha çoxdur. Bu o deməkdir ki, xəstəxanalarda çarpayılar istifadə edilir. Bizə lazımdır ki, karantin tədbirləri nəticəsində çarpayı fondunun istifadəsini 60-70 faizə endirək. Minimum 30-40 faiz çarpayı fondumuz boş qalmalıdır”.

Artıq vəziyyətin stabilləşdiyini bildirən Nabil Seyidov yumşaldılma tədbirləri görüləcəyi təqdirdə yenidən artım müşahidə edilə biləcəyini qeyd edib.

“Birinci dəfə karantin qaydalarının yumşaldılması göstərdi ki, yoluxmalar qəflətən artmağa başladı. O zaman çarpayı və tibb personalının sayı baxımından ciddi problemlər yaranmaqda idi. Karantin rejimi 3 avqusta və ya 20 avqusta qədər uzadılsa belə, vətəndaşlar maskalardan istifadə etməsə, məsafə saxlanılmasa, obyekt sahibləri sanitar-gigiyenik qaydalara riayət etməsələr, o zaman yenə də ciddi artım baş verəcək”.