Şəkidə ağır yol nəqliyyat hadisəsi baş verib. 

APA TV-nin məlumatına görə, hadisə gecə saat 01 radələrində  Şəki-Qax avtomobil yolunun Şəkinin İnçə kəndindən keçən hissəsində qeydə alınıb.

Şəki sakini, 37 yaşlı  Ruslan Zeynalovun idarə etdiyi 90-OT-023 dövlət qeydiyyat nişanlı BMW markalı avtomobil idarəetmədən çıxaraq körpüdən çaya düşüb. Avtomobildə sıxılmış vəziyyətdə qalan sürücü Ruslan Zeynalovu və daha bir nəfər, sərnişin 39 yaşlı Ramil Teymurovu xilas etmək üçün əraziyə Fövqəladə Hallar Nazirliyinin (FHN) Şəki rayon Dövlət Yanğından Mühafizə Xidmətinin Qəza Xilasedici dəstəsi cəlb olunub. 

Avtomobildə sıxılmış vəziyyətdə qalan hər iki nəfər xilasedicilər tərəfindən  çıxarılaraq aidiyyəti üzrə  Təcili Tibbi Yardım stansiyasının həkim briqadasına təhvil veriliblər. Yaralılar Şəki Rayon Mərkəzi Xəstəxanasına yerləşdiriliblər. 

Xəstəxanadan verilən məlumata görə, yaralıların hər ikisinin vəziyyəti ağır qiymətləndirilir.

Faktla bağlı araşdırma aparılır.