Bakıda bir yaşlı övladını öldürməkdə şübhəli bilinən qadın saxlanıb. Prokurorluqdan verilən məlumata görə, o, uşağının yeməyinə hidrogen-peroksid qataraq qəsdən onu zəhərləyib. İddialara görə, qadın daha sonra körpəni boğub.

OXU24.COM Xəzər Xəbər-ə istinadən xəbər verir ki, ağır cinayət paytaxtın Suraxanı rayonunda baş verib. 1 yaşlı Yusif Bağıyevin ölməsi barədə rayon prokurorluğuna məlumat daxil olub. Dərhal hadisə yerinə hüquq-mühafizə orqanlarının əməkdaşları gəlib araşdırmalara başlayıblar.

Prokurorluqdan verilən məlumata görə, aparılan araşdırmalarla zərərçəkmişin anası, 20 yaşlı Nərgiz Bağıyeva 1 yaşlı uşağını zəhərləməklə qəsdən öldürməsinə əsaslı şübhələr müəyyən edildiyindən o saxlanaraq istintaqa cəlb edilib. 

Övladını öldürməkdə şübhəli bilinərək saxlanılan Nərgiz Bağıyevanın anası Leyla Bağıyeva deyir ki, qızında son vaxtlar psixoloji problemlər yaranıbmış.

Ağır cinayətdən bir neçə saat əvvəl onlarda olan qohumu Hüseyn adlı şəxsə isə Nərgiz Bağıyeva hadisə anını belə izah edib.

Faktla bağlı Suraxanı rayon prokurorluğunda Nərgiz Bağıyeva barəsində ''qəsdən adam öldürmə'' maddəsi ilə cinayət işi başlanıb.

İş üzrə istintaq davam edir.