Sükan arxasında siqaret çəkməyin cəzası varmı? – Hüquqşünasdan AÇIQLAMA  

Yollarda hərəkətin təhlükəsizliyi həm sürücülərin, həm də piyadaların həyatı üçün müstəsna əhəmiyyət kəsb edir. Avtomobil idarə edərkən diqqəti yayındıran kiçik bir səhlənkarlıq belə ağır yol-nəqliyyat hadisələrinə yol aça bilər. Bəzi hallarda sürücülərin sükan arxasında siqaret çəkməsi cəmiyyətdə müzakirə olunan mövzulardan biridir. Çünki avtomobil sürərkən siqaret yandırmaq və ya onu əldə saxlamaq sürücünün diqqətini birbaşa yoldan yayındırır. Bu hal təkcə sürücünün deyil, digər hərəkət iştirakçılarının da təhlükəsizliyini ciddi risk altına atır. 

Bir çox hüquqşünaslar və yol hərəkəti üzrə ekspertlər bu vərdişin potensial qəza şəraiti yaratdığını vurğulayırlar. Bəs qanunvericilik sükan arxasında siqaret çəkən şəxslərin məsuliyyəti ilə bağlı nəyi nəzərdə tutur? Sürücülərin avtomobildə tütün məmulatından istifadə etməsinə görə birbaşa cərimə tətbiq olunub-olunmaması vətəndaşlar arasında suallar doğurur. Mövzu ilə bağlı mövcud hüquqi tənzimləmə və tətbiq edilən cərimə məbləğləri bir çox sürücü üçün qaranlıq qalır.

Oxu24.com məsələyə aydınlıq gətirmək üçün hüquqi müstəvidə nəzərdə tutulmuş qaydaları və cərimə şərtlərini araşdırıb.

Məsələ ilə bağlı Oxu24.com-a açıqlama verən hüquqşünas Ramil Süleymanov bildirib ki, Azərbaycan qanunvericiliyinə əsasən, nəqliyyat vasitəsində siqaret çəkmək özlüyündə ayrıca inzibati xəta tərkibi yaratmır. Yəni sırf sükan arxasında siqaret çəkdiyinə görə sürücüyə qarşı birbaşa cərimə protokolu tərtib edilmir.

Lakin hüquqşünas diqqəti əsas hüquqi məsuliyyət yaradan məqama — siqaret tullantısının ətrafa atılmasına yönəldib:

“Azərbaycanda siqaret çəkmək avtomobildə ayrıca inzibati xətaya səbəb olmur. Amma çəkilmiş siqareti ətrafa, çölə atmaq İnzibati Xətalar Məcəlləsinin 212.4-cü maddəsinə görə 300 manat məbləğində inzibati qaydada cəriməyə səbəb olur”.

Ramil Süleymanovun sözlərinə görə, siqaretin avtomobilin pəncərəsindən yola və ya ətraf mühitə atılması həm ekoloji çirklənməyə, həm də digər nəqliyyat vasitələri üçün ciddi qəza və yanğın riskinə şərait yaradır. Bu səbəbdən qanunvericilik siqaret kötüyünü çölə atan sürücülər üçün 300 manat məbləğində cərimə nəzərdə tutur. Əməl kamera və ya Yol Patrul Xidməti əməkdaşları tərəfindən aşkar edildikdə sürücü barəsində inzibati tənbeh tədbiri tətbiq olunur.

Beləliklə, nəqliyyat vasitəsində siqaret çəkmək birbaşa qadağan olunmasa da, sürücülərdən həm yol hərəkəti təhlükəsizliyinə riayət etmək, həm də ətraf mühitin çirklənməsinin qarşısını almaq üçün yüksək məsuliyyət tələb olunur. Unutmaq olmaz ki, avtomobildən çölə atılan kiçik bir siqaret izmariti gözlənilməz təhlükələrə də yol aça bilər.

Çimnaz Telmanqızı

Həmçinin oxuyun

Deputatın oğlunu Ceyhunla nə birləşdirib? - Şok faktlar

Məhkəmə deputatın oğlu ilə bağlı QƏRAR VERİB

Deputat oğlunun işi üzrə YENİ DETAL

Əməkdar artist  vəfat edib