Qanun sərtləşdi, amma erkən evliliklər bitmədi – Sosioloq səbəbi GÖSTƏRDİ  

Azərbaycanda son illərdə erkən evliliklərlə mübarizə istiqamətində ciddi qanunvericilik və preventiv tədbirlər gücləndirilmişdir. Ölkə qanunvericiliyinə edilən mühüm dəyişikliklər nəticəsində nikah yaşı rəsmi olaraq 18 müəyyənləşdirilmişdir. Bununla yanaşı, yetkinlik yaşına çatmayan şəxslərin erkən evliliyə cəlb edilməsinə görə hüquqi məsuliyyət nəzərəçarpacaq dərəcədə sərtləşdirilmişdir. Dövlət qurumları və vətəndaş cəmiyyəti institutları tərəfindən bu istiqamətdə profilaktik tədbirlərin miqyası ildən-ilə genişləndirilir. Lakin görülən bütün bu tədbirlərə baxmayaraq, bəzi hallarda cəmiyyətdə bu neqativ problem hələ də tam olaraq aradan qalxmamışdır. Qeyd olunan məsələlərin yaranma səbəbləri və onların kökündən həlli yolları ictimaiyyətin daim diqqət mərkəzində saxlanılır. 

Yaranmış vəziyyəti hərtərəfli dəyərləndirmək üçün Oxu24.com -a açıqlama verən sosioloq Mail Yaqub problemin köklü səbəblərinə və həll yollarına toxunmuşdur. Ekspert bildirib ki, mövcud halların qarşısının tam alınması üçün maarifləndirmə tədbirləri intensiv şəkildə həyata keçirilməlidir.

“Hüquqi maarifçilik gücləndirilməlidir"

Sosioloq açıqlamasında erkən evliliklərin baş vermə səbəblərini və bu sahədə görülməli olan işləri ətraflı şəkildə izah edib. O, problemin əsas kökü kimi cəmiyyətdə hüquqi maarifçiliyin zəif olmasını qeyd edib:

“İnsanlar hüquqdan, qaydalardan və qanunlardan kifayət qədər xəbərdar olmalıdırlar. Hüquqdan xəbərdar olmayan ailələrdə erkən nikaha cəlb olunma kimi neqativ hallar qaçılmaz olaraq baş verə bilər. Azərbaycanda hüquqi maarifləndirmə mütləq şəkildə gücləndirilməlidir. Bu işi hüquqşünaslar və hüquq üzrə təlimçilər aparmalıdırlar”.

Mail Yaqubun sözlərinə görə, artıq heç kim televiziya və ya radionun yayımlarını gözləmir:

“Sosial şəbəkələr hər bir insan üçün əsl tribuna yaradıb. Mütəxəssislər sosial şəbəkələrdə, televiziyada və radioda dayanmadan oturub bu mövzularda danışmalıdırlar. İnsanlar dərk etməlidirlər ki, erkən nikah qanuna ziddir. Qanunazidd əməllərə yol verilməməlidir”.

Sosioloq vurğulayıb ki, erkən nikah qanunsuzluqdur, qanunu pozmaqdır və qanunu pozmaq birbaşa cinayətdir. Hüquq baxımından bu hallara heç vaxt yol verilməzdir. 

Əgər bu istiqamətdə ardıcıl və geniş miqyaslı maarifçilik işləri aparılmasa, cəmiyyətimiz gələcəkdə də bu cür hallarla yenidən qarşılaşmağın və onların şahidi olmağın davamını yaşayacaqdır.

Bütün bu qeyd olunanlarla yanaşı, erkən evliliklərin aradan qaldırılmasında cəmiyyətin hər bir üzvünün fəal mövqe sərgiləməsi vacibdir. Yalnız inzibati cəzalarla kifayətlənmək deyil, həm də köklü maarifləndirmə kampaniyalarının əhatəsini genişləndirmək lazımdır. Gənc nəslin və valideynlərin hüquqi savadlılığının artırılması bu cür neqativ halların gələcəkdə təkrarlanmasının qarşısını alacaq əsas amillərdəndir. Dövlət qurumları, media nümayəndələri və vətəndaş cəmiyyəti bu istiqamətdə səfərbər olaraq birgə mübarizə aparmalıdırlar. Yalnız bu kompleks yanaşma sayəsində cəmiyyətimizdə erkən nikah problemini tamamilə unutmaq mümkün olacaqdır.

Çimnaz Telmanqızı

Həmçinin oxuyun

Məzuniyyətlə bağlı YENİ QAYDA

Quranda adı çəkilən bu quşu möcüzəvi edən NƏDİR?

Tiflisdən Bakı və İrəvana sərhəd ÇAĞIRIŞI: Gürcüstan vasitəçilik rolunu gücləndirir? 

Küçədə həyatına son qoyulan Fatimənin - Fotosu