Birbaşa sübutlar olmadıqda xəsarət alan şəxs nə etməlidir? — HÜQUQİ ADDIMLAR

HÜQUQ

15.09.2026, 19:12

Xəbərlərimizi Google-da izləyin

Yeniliklərdən dərhal xəbərdar olun

Hücum və xəsarət yetirmə kimi halların araşdırılması zamanı hadisəni birbaşa əks etdirən kamera görüntülərinin olmaması heç də işin nəticəsiz qalacağı demək deyil. Cinayət-prosessual qanunvericilik sübut anlayışını yalnız vizual görüntülərlə məhdudlaşdırmır, əksinə, təqib üzrə əhəmiyyət kəsb edən hallar müxtəlif sübutların qarşılıqlı məcmusu əsasında müəyyən edilir. Birbaşa sübutların çatışmadığı vəziyyətlərdə zərərçəkmiş şəxsin təqdim etdiyi məlumatlar, şahid ifadələri və digər dolayı sübutlar araşdırmanın gedişində həlledici rol oynayır. Belə məqamlarda sübutların qanuni yolla əldə olunması, obyektiv yoxlanılması və vəkilin prosesə düzgün cəlb edilməsi vətəndaşların hüquqlarının effektiv müdafiə olunması üçün əsas təminat yaradır.

Mövzu ilə bağlı suallarımızı hüquqşünas Ellada Bayramova cavablandırıb.

Kamera görüntüləri olmadıqda zərərçəkmiş hansı sübutları təqdim etməlidir?

Hüquqşünas bildirib ki, hücum və xəsarət faktının araşdırılmasında kamera görüntüləri mövcud olmadıqda belə, sübutetmə imkanları məhdudlaşmır. Zərərçəkmiş şəxsin təqdim etməli və ya toplanılmasını tələb etməli olduğu əsas sübut növlərinə aşağıdakılar daxildir:

•Ardıcıl və təfərrüatlı ifadə: Hadisənin dəqiq vaxtı, yeri, hücum edən şəxsin hərəkətləri və xəsarətin yaranma səbəbləri barədə aydın məlumatlar.

•Tibbi sənədlər və ekspert rəyi: Təcili tibbi yardım sənədləri, xəstəxanadan çıxarışlar, ambulator qeydlər və bədən xəsarətinin ağırlıq dərəcəsini müəyyən edən tibbi ekspertiza rəyi.

•Şahid ifadələri: Hadisəni bilavasitə görən və ya hadisədən dərhal sonra zərərçəkmişin vəziyyətini müşahidə edən şəxslərin məlumatları.

•Elektron məlumatlar və yazışmalar: Hadisədən əvvəl və sonra aparılmış telefon yazışmaları, fotoşəkillər, mesajlar və digər rəqəmsal dəlillər.

Polis araşdırmasına vəkilin cəlb olunması hansı hüquqları təmin edir?

Ellada Bayramova qeyd edib ki, cinayət prosesində vəkilin iştirakı sadəcə fiziki dəstək deyil, qanunvericiliklə verilmiş hüquqların real şəkildə reallaşdırılması üçün mühüm mexanizmdir. Vəkilin prosesə cəlb edilməsi bu əsas hüquqların qorunmasını təmin edir:

1.Sübutların və digər materialların vaxtında, qanuni qaydada təqdim olunmasına nəzarət etmək.

2.Zəruri istintaq hərəkətlərinin keçirilməsi və əlavə ekspertizaların təyin olunması üçün vəsatətlər vermək.

3.İstintaq və digər prosessual hərəkətlərin protokolları ilə tanış olaraq zəruri qeydlərin aparılmasını tələb etmək.

4.Zərərçəkmiş şəxsin mövqeyinin sənədlərdə tam əks olunmasını təmin etmək və prosessual hərəkətsizliyə qarşı şikayət mexanizmlərindən istifadə etmək.

Çimnaz Telmanqızı

Həmçinin oxuyun