15 yaşlı uşaq avtomobil sürərsə, nə qədər cərimə yazılır? – Ekspertdən AÇIQLAMA  

Son vaxtlar azyaşlıların avtomobil idarə etməsi ilə bağlı sosial şəbəkələrdə və yol hərəkəti ilə bağlı keçirilən reydlər zamanı müxtəlif görüntülər yayılır. Xüsusilə 15-16 yaşlarında uşaqların valideynlərinə və ya digər şəxslərə məxsus avtomobilləri idarə etməsi ciddi təhlükəsizlik problemi olmaqla yanaşı, inzibati məsuliyyət də yaradır.

Bəs sürücülük hüququ olmayan 15 yaşlı uşaq avtomobil idarə edərsə, bu halda nə qədər cərimə tətbiq olunur? Avtomobilin sahibini hansı məsuliyyət gözləyir?

Nəqliyyat üzrə mütəxəssis-ekspert Rüfət Əmiraslanov Oxu24.com-a açıqlamasında bildirib ki, nəqliyyat vasitəsini idarə etmək hüququ olmayan şəxsin avtomobil idarə etməsi qanunvericiliklə inzibati xəta hesab olunur.

Ekspertin sözlərinə görə, burada uşağın yaşının az olması məsuliyyət məsələsini aradan qaldırmır. Əsas məsələ onun nəqliyyat vasitəsini idarə etmək hüququnun, yəni sürücülük hüququnun olub-olmamasıdır.

“15 yaşlı şəxsin sürücülük hüququ olmadan avtomobil idarə etməsi yol hərəkəti qaydalarının ciddi şəkildə pozulmasıdır. Belə halda nəqliyyat vasitəsini idarə edən şəxsə İnzibati Xətalar Məcəlləsinin 332.2-ci maddəsinə əsasən 200 manat məbləğində cərimə tətbiq edilə bilər. Bu məbləğ son illərdə qanunvericiliyə edilmiş dəyişikliklə artırılıb”, – deyə ekspert qeyd edib.

Rüfət Əmiraslanov vurğulayıb ki, məsuliyyət yalnız avtomobili idarə edən şəxslə məhdudlaşmır. Əgər avtomobil sahibi sürücülük hüququ olmayan şəxsin nəqliyyat vasitəsini idarə etməsinə şərait yaradıbsa, bu halda nəqliyyat vasitəsinin sahibinin də inzibati məsuliyyəti yarana bilər.

Onun sözlərinə görə, İnzibati Xətalar Məcəlləsinin 335.1-ci maddəsinə əsasən, nəqliyyat vasitəsini idarə etmək hüququ olmayan şəxsə avtomobilin verilməsinə görə nəqliyyat vasitəsinin sahibinə 60 manat məbləğində cərimə tətbiq edilir.

Ekspert hesab edir ki, valideynlər xüsusilə bu məsələdə diqqətli olmalıdırlar. Bəzən valideynlər uşağın avtomobili qısa məsafədə və ya yaşayış məntəqəsinin daxilində idarə etməsinin ciddi problem yaratmayacağını düşünürlər. Lakin avtomobilin idarə edilməsi üçün sürücülük hüququnun olması yalnız magistral yollarda və ya şəhərin mərkəzi küçələrində deyil, ümumi istifadədə olan yollarda bütövlükdə tələb olunur.

“Uşağın ‘bir az sürməsi’, ‘maşını həyətə çəkməsi’ və ya ‘yaxın məsafəyə getməsi’ kimi yanaşmalar təhlükəni aradan qaldırmır. Avtomobil idarə etmək müəyyən bilik, bacarıq, yaş və hüquqi hazırlıq tələb edir. Uşaq sükan arxasında qəfil vəziyyətlə qarşılaşdıqda düzgün qərar verə bilməyə bilər. Nəticədə söhbət yalnız cərimədən yox, insan həyatına və sağlamlığına təhlükə yarada biləcək hadisədən gedir”, – deyə Rüfət Əmiraslanov bildirib.

Mütəxəssis əlavə edib ki, azyaşlının avtomobil idarə etməsi qəza ilə nəticələnərsə, məsələ daha ağır hüquqi nəticələrə səbəb ola bilər. Belə halda təkcə sürücülük hüququnun olmamasına görə tətbiq edilən inzibati cərimə ilə kifayətlənmək mümkün deyil. Qəzanın nəticəsindən, digər şəxslərə sağlamlıq və ya maddi zərər vurulub-vurulmamasından asılı olaraq əlavə hüquqi məsuliyyət məsələləri də ortaya çıxa bilər.

Rüfət Əmiraslanov valideynləri və avtomobil sahiblərini uşaqlara avtomobil idarə etməyə icazə verməməyə çağırıb. Onun sözlərinə görə, bəzən uşağın avtomobil sürməsini sosial şəbəkələr üçün çəkib paylaşmaq da adi hal kimi qəbul edilir. Halbuki belə davranış həm uşağın özünün, həm də digər yol hərəkəti iştirakçılarının həyatını təhlükəyə ata bilər.

Qeyd edək ki, hazırkı qanunvericiliyə əsasən, nəqliyyat vasitəsini idarə etmək hüququ olmadan avtomobil idarə edilməsinə görə əsas cərimə 200 manatdır. Eyni zamanda, idarəetmə hüququ olmayan şəxsə avtomobili verən nəqliyyat vasitəsi sahibinin də 60 manat məbləğində cərimə edilməsi nəzərdə tutulur.

Beləliklə, 15 yaşlı uşağın avtomobil idarə etməsi “uşaqdır, məsuliyyət daşımır” yanaşması ilə qiymətləndirilə bilməz. Hadisənin konkret hallarından asılı olaraq həm avtomobili idarə edən şəxsin, həm də avtomobili ona verən şəxsin məsuliyyəti məsələsinə hüquqi qiymət verilə bilər. Ən əsası isə cərimədən daha böyük təhlükə – sürücülük təcrübəsi və hüququ olmayan azyaşlının yolda qəza törətməsi və digər insanların həyatını riskə atmasıdır.

Nigar

Həmçinin oxuyun

Kanat qəzasında günahkar kimdir? – Məsul şəxsləri 7 ilədək həbs gözləyə bilər   

Təhsil sistemində köklü İSLAHAT: Pedaqoji ixtisaslar yalnız dövlət sifarişi ilə olmalıdır?   

Azərbaycanda ata oğlunun toyunda HƏBS OLUNDU 

Azərbaycanda bu şəxslərə 100 min manat veriləcək