Ucar rayonunda şəhid Elçin Mübariz oğlu İsmayılovun anım mərasimi və adına inşa edilmiş xatirə bulağının açılışı olub.
RegionXəbərləri.com-un məlumatına görə tədbirdə rayon rəsmiləri, sakinlər, qazilər, şəhid ailələri və Elçin İsmayılovun ailə üzvləri iştirak ediblər.
İlk olaraq Şəhidin məzarı ziyarət edilib, sonra Ucar şəhərinin Oğuz küçəsi ərazisində inşa edilmiş xatirə bulağının açılışı olub.

Şəhid Elçin İsmayılov 30 may 1989-cu il tarixdə Ucar şəhərində anadan olub. 1995-2006-cı illərdə Ucar şəhərində 1 nömrəli tam orta məktəbdə təhsil alıb. Ali hərbi təhsilini 2006-2010-cu illərdə Heydər Əliyev adına Azərbaycan Ali Hərbi Məktəbində (AAHM) "Motoatıcı Taqım Komandiri" ixtisası üzrə alıb. 2010-2011-ci illərdə isə Silahlı Qüvvələrin Təlim və Tədris Mərkəzində (TTM) təlimlərdə olub.

Elçin İsmayılov 2011-ci ildən Azərbaycan Silahlı Qüvvələrinin Ağcabədi rayonunda yerləşən "N" saylı hərbi hissəsində Motoatıcı Taborun Taqım Komandiri vəzifəsində xidmət edib. Azərbaycan Ordusunun kapitanı olan Elçin İsmayılov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Murovdağ istiqamətində gedən döyüşlərdə, həmçinin Füzulinin və Cəbrayılın azadlığı uğrunda gedən döyüşlərdə savaşıb. Oktyabrın 4-də Cəbrayıl şəhəri işğaldan azad ediləndə, ora Azərbaycan bayrağını sancanlardan biri Elçin İsmayılov idi. Elçin İsmayılov oktyabrın 7-də Füzuli döyüşləri zamanı şəhid olub. 8 oktyabr 2020-ci il tarixdə Ucar şəhərinin Şəhidlər Xiyabanında dəfn olunub.Ailəli idi. 2 oğlu yadigar qalıb.

Allah rəhmət eləsin.

Fuad Hüseynov RegionXəbərləri.com