Oxu24.com Bloomberg-ə istinadən  xəbər verir ki, Avropa Komissiyası Ukraynanın Avropa İttifaqına daxil olması prosesinə oktyabrda başlamağı tövsiyə edəcək.

Məsələ ilə tanış olan insanların fikrincə, Avropa Komissiyasının gələn ay çoxillik üzvlük prosesinin başlamasını tövsiyə edəcəyi gözlənilir. Lakin o, aralıq addımlar kimi bəzi prioritet sahələrdə, o cümlədən korrupsiya ilə mübarizədə irəliləyişə təkid edə bilər, həmsöhbətlər əlavə ediblər.

Nəşr yazır ki, Avropa Komissiyası öz tövsiyəsini təqdim etdikdən sonra Aİ liderləri bunu dekabrda keçiriləcək sammitdə təsdiq etməli olacaqlar.

Bundan sonra Ukrayna islahatları başa çatdırmaq və qanunvericiliyini qanunun aliliyi və iqtisadiyyat da daxil olmaqla 30-dan çox sahədə Aİ qanunvericiliyinə uyğunlaşdırmaq üçün “uzun prosesə” başlayacaq.

Gələn ayın əvvəlində İspaniyanın Qranada şəhərində Aİ liderlərinin genişlənmə prosesini və yeni üzvləri qarşılamağa necə hazırlaşmalı olduqlarını müzakirə edəcəkləri bildirilir.

Bloomberg qeyd edir ki, Aİ üçün Ukraynanın üzvlüyü blokun yeni üzvləri qəbul etmək və qərar qəbuletmə mexanizmini uyğunlaşdırmaq qabiliyyətini sınayacaq. İki gün əvvəl Avropa Komissiyasının rəhbəri Ursula fon der Leyen Avropa İttifaqını icmanı 30-dan çox ölkəyə genişləndirməyə hazırlaşmağa çağırıb və bunun “Avropanın strateji maraqlarına” uyğun olduğunu qeyd edib.

Müəllif:Afət