Krımda ukraynalı iş adamlarına məxsus əvvəllər milliləşdirilmiş əmlakların satışı üzrə səkkiz auksion keçirilib.

Oxu24.com xəbər verir ki,bu barədə yarımadanın “parlament rəhbəri” Vladimir Konstantinov məlumat verib.

Hərraca ümumi dəyəri 815 milyon rubldan çox olan yaşayış və kommersiya daşınmaz əmlakı çıxarılıb. Belə hərraclar ilk dəfə Krımda keçirilib.

“Terrorla Mübarizə Komissiyası Krımdakı ukraynalı oliqarxların əmlakının müəyyən edilməsi istiqamətində işi davam etdirir. Biz imkan verməyəcəyik ki, rus xalqının qətlinə sponsorluq edən və terrorçu Kiyev rejimini dəstəkləyən bu ictimaiyyət bizim sakinlərimizdən pul qazansın”, – deyə Konstantinov yüksək səslə söz verib.

Milliləşdirilmiş əmlakın satışı üzrə hərraclar davam edir; hazırda ümumi dəyəri 27 milyon rubl olan dörd yaşayış binası hərraca çıxarılır. Gələcəkdə ilhaq edilmiş bölgənin hakimiyyət orqanları milliləşdirilmiş əmlakın 100-ə yaxın obyektini, o cümlədən Konstantinovun dediyi kimi, “Zelenski cütlüyünə” məxsus mənzili satmaq niyyətindədir.

Müəllif:Miri Məcidli