Kiprdə insident: BMT və KKTC ordusu arasında toqquşma

Kiprdə Pyla kəndində BMT sülhməramlıları ilə Şimali Kipr Türk Cümhuriyyətinin (KKTC) təhlükəsizlik qüvvələri arasında yaşanan gərginlik fonunda ikinci insident baş verib.

 

Oxu24.com xəbər verir  ki,bu barədə Türkiyə mətbuatı məlumat yayıb.

Hadisə dünən günorta saatlarında sərhəd zastavasının yaxınlığında baş verib. Demilitarizasiya zonasında sərhəd kimi xidmət edən Burhan Tan küçəsi ərazisində Şimali Kipr Türk Cümhuriyyətinin Təhlükəsizlik Qüvvələrinin əsgərləri ilə BMT əsgərləri arasında toqquşma baş verib.

Şimali Kipr Türk Cümhuriyyətinin xarici işlər naziri Tahsin Ərtoğruloğlu isə hadisəyə sərt reaksiya verərək, “Müvafiq cavab verəcəyik və bu, diqqətdən kənarda qalmayacaq” deyib.

Birləşmiş Millətlər Təşkilatının (BMT) sülhməramlı qüvvələrinin Kiprdəki rəsmi nümayəndəsi Alim Siddiq də bu hadisə ilə bağlı araşdırmalara başlanıldığını qeyd edib.

Xatırladaq ki, avqustun sonunda ŞKTC təhlükəsizlik qüvvələri ilə BMT sülhməramlıları arasında gərginlik yaranmışdı. Münaqişəyə KKTC-nin BMT sülhməramlılarının nəzarətində olan Yaşıl Xətt üzərindəki Pyle kəndinə yol çəkmək planları səbəb olub. Sülhməramlılar əraziyə beton bloklar qoyaraq tikintinin qarşısını almağa cəhd ediblər. Nəticədə tərəflər arasında qarşıdurma yaranıb.

 

Müəllif: Nigar