Keniya bütün ölkələr üçün vizanı ləğv etməyi planlaşdırır

Keniya prezidenti Uilyam Ruto ölkəsinin bir neçə ay ərzində bütün ölkələrə viza azadlığı verməyi planlaşdırdığını açıqlayıb.

Oxu24.com xəbər verir  ki,Paytaxt Nayrobidə keçirilən Afrika İqlim Sammitində danışan Ruto Keniyanın bəşəriyyətin ilk məskənlərinə ev sahibliyi etdiyinə diqqət çəkərək, buranı ziyarət edənlərdən viza istəməyin doğru olmayacağını bildirib.

Ölkəsinin bütün bəşəriyyətin vətəni olduğunu bildirən Ruto, "Bir neçə ay ərzində bütün vizaları ləğv etməyi planlaşdırırıq",-deyə məlumatda qeyd edilib.

Vəzifəyə gəldiyi gündən bəri bir çox ölkə ilə vizaları ləğv edən Ruto daha əvvəl bütün afrikalılara viza azadlığı verəcəyini açıqlamışdı.

Afrika İttifaqı və Keniya hökumətinin birgə keçirdiyi “Afrika və dünya üçün yaşıl inkişaf və iqlimin maliyyələşdirilməsi həllərinin dəstəklənməsi” mövzusunda sammit Nayrobidəki Kenyatta Beynəlxalq Konqres Mərkəzində keçirilir. 3 günlük sammit dekabrda keçiriləcək Birləşmiş Millətlər Təşkilatının (BMT) İqlim Dəyişikliyi üzrə Çərçivə Konvensiyasına (COP28) Tərəflərin 28-ci Konfransı öncəsi danışıqlar öncəsi və ilkin hazırlıq kimi qiymətləndirilir.

Sammitdə Afrika dövlət başçıları, COP28 prezidenti Sultan Əl Cabir, ABŞ prezidentinin iqlim üzrə xüsusi nümayəndəsi Con Kerri, eləcə də bir çox beynəlxalq təşkilatlar iştirak edir.

Sammitin sonunda Afrikanın yaşıl enerjiyə keçid planını ehtiva edən Nayrobi Bəyannaməsinin dərc olunması planlaşdırılır.

 

Müəllif: Nigar