Ağ Ev təsdiqləyir: Təlimlər sonra F-16 təyyarələri  veriləcək

Ağ Ev təsdiq edib ki, ABŞ ukraynalı pilotların təlimləri başa çatdıqdan sonra Ukraynaya F-16 qırıcı təyyarələrinin verilməsinə razılıq verəcək.

 

Oxu24.com Ukrayna mətbuatına istinadən  xəbər verir ki, bu barədə ABŞ prezidentinin milli təhlükəsizlik üzrə müşaviri Ceyk Sallivan məlumat verib.

Prezident Baydenin müşaviri dövlət katibi Entoni Blinkenin Danimarka və Hollandiyadakı həmkarlarına məktubunun mövcudluğunu təsdiqləyib və məktubda “təlimlərin uğurla başa çatmasından sonra və Konqreslə məsləhətləşmədən sonra” F-16 qırıcılarının çatdırılmasını təsdiqləməyə hazır olduqları bildirilir. 

 

Amerika liderinin Yaponiyada keçirilən G7 sammitində ukraynalıların F-16-da təlim keçəcəyini açıqladığını xatırladan Sallivan, "Bu, prezident Baydenin Xirosimada elan etdiyinin təbii davamıdır",- deyib.

 

O, həmçinin qeyd edib ki, Vaşinqton Kiyevə qırıcı təyyarələr ötürmək niyyətindən əl çəkməyib.

 

Xatırladaq ki, iyulun ortalarında Ukrayna və 11 tərəfdaş ölkə ukraynalı pilotlara F-16 döyüş təyyarələrində təlim keçmək üçün şərtləri müəyyən edən memorandum imzalayıb.

Təlim tədbirlərinin başlanması avqust ayında baş verməli idi, lakin KİV-in məlumatına görə, Avropa ölkələri bu planın bütün təfərrüatları üzrə razılığa gəlmədiyi üçün son təlim planı hələ ABŞ-dan təsdiq almayıb.

 

Müəllif: Nigar