Çin CERES-1 raketi ilə 7 peyk buraxıb

Çin özəl şirkət tərəfindən hazırlanmış ilk daşıyıcı raket olan CERES-1 ilə orbitə 7 peyk göndərib.

Oxu24.com xəbər verir ki, Çinin Sinxua agentliyinin xəbərinə görə, yerin müşahidəsi, məsafədən zondlama və rabitə peykləri də daxil olmaqla peyklər ölkənin şimal-qərbindəki Qansu əyalətindəki Ciucuen Peyk Mərkəzindən "CERES-1 Y7" raketi ilə orbitə buraxılıb.

 

Bildirilib ki, hiperspektral, infraqırmızı və panxromatik avadanlığın daxil olduğu yeni nəsil “Şiguang-1 01” müşahidə peyki təbii ehtiyatların monitorinqi, kənd təsərrüfatı, meşə təsərrüfatı, ağıllı şəhərlər və fəlakətlərin qarşısının alınması sahələrində istifadə olunacaq.

 

Bundan əlavə, bu qrup daxilində süni intellektə əsaslanan uzaqdan zondlama peyki “WonderJourney-1A”, peyk rabitəsi ilə ağıllı qlobal yerləşdirmə xidmətlərini dəstəkləyən “Starpool-1B” peyki və 4 ədəd “Şian Hangtou” optik müşahidə peyki orbitə göndərilib.

 

Peyklərin buraxılışdan sonra planlaşdırılmış orbital mövqeyə yerləşdirildiyi açıqlanıb.

 

Buraxılış CERES-1 raketi ilə 7-ci uğurlu nəqliyyat missiyası idi.

 

İlk buraxılış 2020-ci il noyabrın 7-də Pekin Şinghi Dongli Kosmik Texnologiya Korporasiyası, yəni "Qalaktik Enerji" tərəfindən hazırlanmış bərk yanacaqla işləyən kiçik daşıyıcı raketlə edilib və ondan əvvəlki sonuncu buraxılış iyulun 22-də olub.

Uzunluğu 19 metr, eni 1,4 metr olan raket yerdən 160 kilometr hündürlükdə olan Aşağı Yer Orbitinə 350 kiloqrama qədər yük daşıya bilir.

Çinin kosmik proqramında əsas daşıyıcı kimi dövlətə məxsus Çin Aerokosmik Elm və Texnologiya Korporasiyası tərəfindən istehsal edilmiş və inkişaf etdirilən Long March raketlərindən istifadə edilir.

Son illərdə dünyada özəl sektorun kosmik raket istehsalına marağının artması ilə paralel olaraq Pekin rəhbərliyinin də bu sahədə özəl sektor təşəbbüslərini dəstəklədiyi müşahidə edilir.

Galactic Energy-dən başqa, Çin özəl şirkətləri i-Space "SQX-1Y1" raketləri və Space Pioneer "TL-2 Y1" raketləri ilə havaya buraxılır.

 

Müəllif: Miri Məcidli