Aİ Abxaziya və Cənubi Osetiyanı sülh yolu ilə Gürcüstana qaytarmaq istəyir

Avropa İttifaqının Gürcüstandakı münaqişənin sülh yolu ilə həllinə sadiqliyi hər zamankindən daha güclüdür.

 

Oxu24.com xəbər verir ki, bu barədə Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi Cozep Borrel Rusiya və Gürcüstan arasında münaqişənin 15-ci ildönümü münasibətilə bildirib.

O, əlavə edib ki, Aİ Rusiyanın Abxaziya və Cənubi Osetiyada hərbi mövcudluğunu davam etdirməsini pisləyir, bu, beynəlxalq hüququn və Rusiyanın Avropa İttifaqının vasitəçiliyi ilə 12 avqust 2008-ci il tarixli sazişdən irəli gələn öhdəliklərinin pozulmasıdır.

 

“Avropa İttifaqı Cenevrə Beynəlxalq Müzakirələrinin həmsədri kimi və Aİ-nin xüsusi nümayəndəsinin səyləri də daxil olmaqla, münaqişənin həlli üzrə səylərlə tam məşğuldur.

 

Biz bütün iştirakçıları 12 avqust 2008-ci il tarixli altı bənddən ibarət razılaşmanın tam həyata keçirilməsinə nail olmaq üçün müzakirələrdə konstruktiv iştirak etməyə çağırırıq.

Biz həmçinin qaçqınların və məcburi köçkünlərin könüllü, təhlükəsiz və ləyaqətli qayıtmaq hüququnu vurğulayırıq”, - bəyanatda deyilir.

Borrelin sözlərinə görə, Aİ Gürcüstanda münaqişənin sabitləşdirilməsi və həlli istiqamətində səyləri davam etdirmək öhdəliyini təsdiq edir və beynəlxalq səviyyədə tanınmış sərhədləri daxilində bu ölkənin müstəqilliyi, suverenliyi və ərazi bütövlüyünə güclü dəstəyini bir daha bəyan edir.

 

Müəllif: Miri Məcidli