Sinqapurda bu həftə iki məhkum narkotik alverçisi, o cümlədən son 20 ildə ölümə məhkum edilən ilk qadın asılacaq.

Xarici mediya bildirir ki, məhkum edilmiş Sarideva Camani cümə günü edam olunmaq üçün göndəriləcək. 2018-ci ildə 30 qrama yaxın heroini satdığı üçün ölüm cəzasına məhkum edilib.

"Edam edilsə, o, 36 yaşlı bərbər Yen Mey Voenin narkotik alverinə görə asıldığı 2004-cü ildən bəri Sinqapurda edam edilən ilk qadın olacaq", - yerli hüquq müdafiəçisi Transformative Justice Collective (TJC) fəalı Kokila Annamalayın açıqlamasında bildirilir.

Çərşənbə günü daha bir nəfərin - 50 qram heroin alverində təqsirli bilinən şəxsin edam ediləcəyi gözlənilir.

TJC hər iki məhbusun sinqapurlu olduğunu və edam tarixləri barədə ailələrinə məlumat verildiyini bildirib.

Sinqapurda müəyyən cinayətlər, o cümlədən adam öldürmə və bəzi adam oğurluğu növləri üçün ölüm cəzası var. Sinqapur həmçinin 500 qramdan çox kannabis və 15 qram heroin alverinə görə ölüm cəzası ilə dünyanın ən sərt narkotik qanunlarına malikdir.

Hökumətin COVID-19 pandemiyası zamanı iki illik fasilədən sonra edamları bərpasından sonra ən azı 13 nəfər asılıb.