Pakistanın Hayber-Paxtunxva əyalətində hökumət binası yaxınlığında törədilən partlayış nəticəsində bir polis ölüb, 8 nəfər yaralanıb.

Oxu24.com xəbər  verir  ki, yerli  KİV-in məlumatına görə, əyalətin Xeybər bölgəsindəki Bara Bazar rayonundakı rayon administrasiyası kompleksi yaxınlığında bombalı hücum həyata keçirilib. Hücum nəticəsində 1 polis həyatını itirib, 8 nəfər yaralanıb.

Səlahiyyətlilər partlayışın təsiri ilə uçan divarın altında bəzi insanların qaldığını və bu insanların yaralı olaraq xilas edildiyini qeyd edib.

Son 24 saatda Hayber Paxtunxvada baş verən hücumlarda 3 polis həlak olub.

Ötən gecə Pişəvərdə polis əməkdaşlarına qarşı silahlı hücum nəticəsində 2 polis həlak olub. İyulun 18-də Pişəvərin Həyatabad bölgəsində təhlükəsizlik qüvvələrinə məxsus avtomobilin yaxınlığında intiharçı hücumu həyata keçirilib və 7-si təhlükəsizlik qüvvələri olmaqla 10 nəfər yaralanıb.

2023-cü ilin ilk 6 ayında terror hücumları 79 faiz artıb

Pakistan Münaqişə və Təhlükəsizlik Araşdırmaları İnstitutunun məlumatına görə, bu ilin ilk 6 ayında terror hücumları 2022-ci illə müqayisədə 79 faiz artıb.

İlin ilk 6 ayında 271 terror aktı baş verib, 389 nəfər həyatını itirib. 2022-ci ilin eyni dövründə 151 terror aktı baş verib, 293 nəfər həyatını itirib.

Son aylar ölkədə, xüsusən də Hayber Paxtunxva və Bəlucistan əyalətlərində terror aktları artıb.

İslamabad bu hücumların Əfqanıstanda yerləşən Pakistan Talibanı (TTP) tərəfindən planlaşdırıldığını və idarə edildiyini iddia edir, Əfqanıstan bunu rədd edir.

Tərcümə: Nigar