İndoneziya  Ukraynada demilitarizasiya zonası yaratmağı təklif edir

İndoneziyanın müdafiə naziri Pravobo Subianto Ukraynada atəşkəs rejiminin yaradılmasını və təmas xətti yaxınlığında BMT-nin nəzarəti altında silahsızlaşdırılmış zonanın yaradılmasını təklif edib.

Oxu24.com xəbər verir ki, bu barədə  The Straits Times məlumat yayıb.

Onun təşəbbüsünə hazırda döyüşən tərəflərin quruda tutduğu mövqeləri nəzərə alacaq atəşkəs rejimi və hər tərəfdən 15 km-lik qüvvələrin çıxarılması ilə demilitarizasiya zonasının yaradılması daxildir.

"Demilitarizasiya zonası BMT tərəfindən yerləşdirilən sülhməramlı qüvvələr tərəfindən izlənilməlidir", - o deyib.

Nazir əlavə edib ki, sakinlərin üstünlük təşkil edən əhval-ruhiyyəsini obyektiv şəkildə müəyyən etmək üçün müxtəlif mübahisəli ərazilərdə BMT-nin dəstəyi  ilə referendum keçirilməlidir.

Sinqapurda keçirilən Asiya Təhlükəsizlik Sammitində ("Şanqri-La Dialoq") çıxış edən Subianto həmçinin sammit iştirakçılarına Rusiya Federasiyası və Ukraynanı dərhal danışıqlara başlamağa çağıran bəyannamə qəbul etməyi təklif edib.

Mart ayında Çin Ukraynanın nizamlanması planını təqdim etdi. Çinin xarici işlər naziri Qin Qanq daha əvvəl bildirmişdi ki, bu, yalnız dinc danışıqlar əsasında və bütün maraqlı tərəflərin narahatlıqlarını nəzərə almaqla mümkündür.

Çin Xarici İşlər Nazirliyinin xüsusi nümayəndəsi Li Hui bir sıra ölkələrə, o cümlədən Rusiya Federasiyasına və Ukraynaya səfərindən sonra bildirib ki, Pekin ardıcıl olaraq Ukraynada münaqişənin deeskalasiyası və sülhün təşviqi tərəfdarıdır və bütün ölkələrlə dialoqu davam etdirmək niyyətindədir. Tərəflər Çin Sədri Si Cinpinin nizamlanma təkliflərinə əsaslanır.

 

Tərcümə: Miri Məcidli