ABŞ Ukraynaya uzaqmənzilli raketlər verməkdən imtina edib

ABŞ prezidenti Co Baydenin administrasiyası Ukraynaya uzaqmənzilli raketlərin tədarükünü elan edən Böyük Britaniyadan nümunə götürməkdən imtina edib.

Oxu24.com xəbər verir  ki,“Politico” məlumatlı mənbələrə istinadən yazır ki, Vaşinqton 310 km-ə qədər mənzilli ATACMS raketlərini Kiyevə ötürmək niyyətində deyil.

Onların fikrincə, Londonun qərarı Amerika rəsmilərinə “rahat nəfəs almağa” imkan verib, çünki Ukrayna artıq uzaqmənzilli silahlara malik olacaq və bununla bağlı ABŞ-a qarşı tənqidlər daha az olacaq.

Həmsöhbətlərdən biri vurğulayıb ki, ATACMS-i ötürməkdən imtina etməsinə baxmayaraq, Vaşinqton Ukraynanı “Patriot” kimi hava hücumundan müdafiə vasitələri, eləcə də sursat və zirehli texnika ilə təmin etməyə davam edəcək.

Eyni zamanda, Böyük Britaniya bir şərtlə Kiyevə uzaqmənzilli raketlər verməyə razılaşıb - onlardan Ukrayna ərazisindən kənarda hədəflərdə istifadə edilməməlidir, Politico-nun həmsöhbətlərindən biri qeyd edib. Ukrayna Silahlı Qüvvələrinin Rusiyaya dərin zərbələr endirməyə başlaması ilə bağlı narahatlıqlar Vaşinqtonun ATACMS təmin etməkdən imtina etməsinin səbəblərindən biri olaraq qalır.

 

Miri Məcidli