İtaliya miqrasiya probleminə görə fövqəladə vəziyyət elan edib

İtaliya hökuməti miqrant axını və cənub bölgələrinin onları qəbul edərkən yaşadığı çətinliklərlə əlaqədar fövqəladə vəziyyət elan edib. Oxu24.com ANSA agentliyinə istinadən xəbər verir ki, mülki müdafiə və dəniz siyasəti naziri Nello Muzumeçinin təklifi ilə Nazirlər Şurasının iclasında 6 ay müddətinə 5 milyon avronun ayrılmasını nəzərdə tutan müvafiq qərar qəbul edilib. Qeyd olunub ki, belə bir addım Aralıq dənizi marşrutu üzrə miqrasiya axınının artması ilə əlaqədar təcili tədbirlərin görülməsi zərurəti ilə diktə olunur. Daxili İşlər Nazirliyinin məlumatına görə, ilin əvvəlindən dəniz yolu ilə 30 mindən çox miqrant gəlib ki, bu da 2022-ci ilin ilk ayları ilə müqayisədə 4 dəfə çoxdur. Təkcə aprelin 7-dən 10-dək olan müddətdə Aralıq dənizində Kalabriya və Siciliya sahillərində aparılan əməliyyatlar zamanı 3 minə yaxın insan qurtarılıb. Afrika ölkələrindən gələn miqrantların çox hazırda Tunisdən gəlir, buradan siyasi və iqtisadi qeyri-sabitlik səbəbindən bir neçə on mil uzaqlıqda yerləşən İtaliyanın cənub sahillərinə gedişlər dəfələrlə artıb. Hazırkı İtaliya hökuməti qarşısına birinci növbədə qanunsuz daşımaların qabaqlanması vasitəsilə qeyri-qanuni miqrasiyaya qarşı mübarizə vəzifəsi qoyub. Bundan əlavə, rəsmi Roma miqrantların çıxdığı ölkələri ilə işləmək niyyətindədir və həmçinin Avropa İttifaqından (Aİ) konkret cavablar gözləyir. Miqrasiya siyasətinin vahid xətti ilə bağlı məsələ artıq ertələnib və gözlənildiyi kimi, yalnız iyun sammitində müzakirə olunacaq.