CNN: Ukrayna hərbçiləri Çinin pilotsuz təyyarəsini vurub

Ukrayna Çin istehsalı olan  PUA-nı vurub.

Oxu24.com xəbər   verir ki, CNN in yaydığı məlumata görə,  Ukrayna hərbçiləri Çin istehsalı olan pilotsuz uçuş aparatını vurub. Bu, hərbi əməliyyatlar üçün modifikasiya edilmiş “Mugin-5” kommersiya pilotsuz təyyarəsi olub.

Ukrayna hərbçiləri CNN-ə bildiriblər ki, onlar kiçik silahlarla pilotsuz uçan aparatı vurublar — cihaz çox aşağı hündürlükdə uçurdu. Telekanalın müxbiri PUA-nın gövdəsində güllə dəliklərinin göründüyünü təsdiqləyib.

CNN-ə müsahibə verən ekspertlərdən biri qeyd edib ki, dronda 3D çap edilmiş komponentlərdən hazırlanmış bomba buraxma mexanizmi var. Ekspert hesab edir ki, bu, dronun çoxlu istifadə üçün nəzərdə tutulduğunu göstərir.

Dronların istehsalında ixtisaslaşan Çinin Mugin Limited şirkəti Ukraynada vurulan PUA-nın onların  olduğunu təsdiqləyib. Şirkətdə pilotsuz uçan aparatın bu cür istifadə edilməsi faktını "bədbəxtlik" adlandırıb və "onun qarşısını almaq üçün mümkün olan hər şeyi etdiklərini" bildiriblər.

Şirkət daha əvvəl öz pilotsuz təyyarələrinin hərbi məqsədlər üçün istifadəsini pisləyən bəyanatla çıxış etmiş, həmçinin genişmiqyaslı müharibə başlayandan bəri Rusiya və Ukraynadan sifariş qəbulunu dayandırdığını bildirmişdi.

CNN hadisə ilə bağlı şərh almaq üçün Rusiya Müdafiə Nazirliyi ilə əlaqə saxlasa da, hələlik cavab almayıb.

 

Tərcümə: Miri Məcidli