Rusiyalı varlılar Afrikada fil ovlayır – 10 min dollara...

Qərbin sanksiyaları səbəbindən səyahət məhdudiyyətləri ilə üzləşən varlı ruslar yeni premium istirahət yerləri axtarırlar. 
OXU24.COM  “Bloomberg”ə istinadən xəbər verir ki, bunu Zimbabvedə yerləşən Safari Operatorları Assosiasiyasının prezidenti Emmanuel Fundira deyib.

Fundira bildirib ki, ötən gün Rusiyadan olan bir turist bu turlardan birinə yarım milyon dollar xərcləyib:
“Son vaxtlar bu istirahət məkanına, xüsusən də Rusiyadan gələn turistlər arasında maraq artıb. Buna bir neçə amil kömək etdi. Əvvəllər ABŞ və Avropadan zəngin turistlər Zimbabveyə safariyə gəlirdilər. Amma insan haqlarının pozulmasına və seçki saxtakarlığına görə sanksiyaların tətbiqindən sonra bu istiqamət onlar üçün əlçatmaz oldu. Zimbabve hakimiyyəti Çin, Rusiya və Belarusla münasibətləri gücləndirməyə çalışır. Bu ölkələrdən turist axını artır, çünki anti-Rusiya sanksiyalarının tətbiqindən sonra premium tətillər üçün əvvəllər məşhur olan bir çox yerlər Rusiyadan olan zənginlər üçün əlçatmaz hala gəldi. Zimbabve turizmi inkişaf etdirmək üçün Rusiya ilə dostluq əlaqələrindən istifadə etməyə çalışır”.
Emmanuel Fundira qeyd edib ki, iyulun 26-29-da Sankt-Peterburqda keçirilməsi planlaşdırılan Rusiya-Afrika İqtisadi Forumu safari turizminin inkişafına töhfə verəcək. 
Onun sözlərinə görə, forumda zəngin ruslar arasında Zimbabvedə safari turlarının reklamı planlaşdırılır.
Qeyd olunur ki, Zimbabve Afrikada fillərin sayına görə ikinci yerdədir. Ümumilikdə ölkədə 100 minə yaxın fil var. Ölkədə rəsmi olaraq fil ovlamaq üçün icazə almaq mümkündür. Belə icazə yalnız 10 min dollara başa gəlir.