Blinken Qazaxıstan, Özbəkistan və Hindistana səfər edəcək

ABŞ dövlət katibi Entoni Blinken fevralın 28-dən martın 3-dək Qazaxıstan, Özbəkistan və Hindistana səfər edəcək.

Oxu24.com  xəbər verir ki, bu barədə Dövlət Departamentinin mətbuat xidmətinin rəhbəri Ned Praysın yaydığı yazılı bəyanatda deyilir.

Amerika diplomatiyasının rəhbəri Astanada Mərkəzi Asiyanın beş ölkəsi (Qazaxıstan, Qırğızıstan, Tacikistan, Türkmənistan, Özbəkistan) və ABŞ arasında qarşılıqlı fəaliyyət üçün çoxtərəfli mexanizm olan formatda nazirlərin görüşündə iştirak edəcək.

İclas formatın iştirakçısı olan ölkələr arasında iqtisadi, enerji, ekoloji və təhlükəsizlik sahəsində əməkdaşlığın gücləndirilməsinə həsr olunacaq.

Dövlət Departamentinin rəhbəri daha sonra Daşkəndə gedəcək və orada Özbəkistanın yüksək vəzifəli rəsmiləri ilə görüşəcək. Martın 1-də Blinken Nyu-Dehliyə uçacaq və burada G20 ölkələrinin xarici işlər nazirlərinin görüşündə iştirak edəcək.

 

Miri Məcidli