Baydenin Ukraynaya F-16 verməkdən imtina etməsi Pentaqonun narazılığına səbəb olub

ABŞ Müdafiə Nazirliyi ABŞ prezidenti Co Baydenin F-16 qırıcılarını Ukraynaya verməkdən imtina etməsinə şübhə və narazılıqla reaksiya verib.

 

Oxu24.com  xəbər  verir  ki,  bu  barədə  The Washington Post yazıb.

Pentaqon Ukraynaya daha fəal dəstək verilməsinin tərəfdarıdır. Bununla belə, Ağ Evin Ukrayna Silahlı Qüvvələrinə hərbi yardım göstərilməsi məsələsinə ehtiyatlı yanaşması ABŞ Müdafiə Nazirliyində məyusluq yaradır.

Departament hesab edir ki, F-16 qırıcılarının Ukraynaya təhvil verilməsi bir az sonra təsdiqlənəcək. Əvvəllər elə hallar olub ki, ABŞ administrasiyası Ukraynanın müəyyən növ silahların tədarükü ilə bağlı müraciətlərini rədd edib, lakin sonda mövqeyini dəyişib. Nümunə olaraq M1 Abrams tanklarının Ukraynaya verilməsi ilə bağlı vəziyyəti xatırladırlar.

Bundan əvvəl ABŞ Müdafiə Nazirliyinin sözçüsü Patrik Rayder bildirib ki, ABŞ hərbi paketləri Ukraynanın ehtiyac və tələblərinə uyğunlaşdıracaq.

Onun sözlərinə görə, bəzi ölkələr Ukraynanın mövcud hərbi hava qüvvələri potensialını dəstəkləmək və gücləndirmək üçün artıq qısamüddətli yardım göstərib.

Nəşr əlavə edir ki, yəqin ki, söhbət sovet təyyarələri üçün ehtiyat hissələrin tədarükündən gedir.

 

Tərcümə: Miri Məcidli