Cənubi Koreya Şimali Koreyaya xəbərdarlıq edib

Cənubi Koreyanın Müdafiə Nazirliyi Şimali Koreyaya xəbərdarlıq edib ki, nüvə silahından istifadə etmək cəhdi “rejimin süqutuna” gətirib çıxaracaq.

Oxu24.com xarici mediaya istinadən xəbər  verir  ki, Seul Şimali Koreya lideri Kim Çen Inın ölkənin nüvə arsenalını eksponensial artırmaq çağırışına belə cavab verib.

Yonhap xəbər agentliyi Cənubi Koreyanın Müdafiə Nazirliyindən sitat gətirib: "Biz ciddi şəkildə xəbərdarlıq edirik ki, Şimali Koreya nüvə silahından istifadə etməyə cəhd edərsə, bu, Kim Çen In rejiminin süqutuna səbəb olacaq".

Departament KXDR-i müharibəyə başlamağa hazır olmaqda ittiham edib və Şimali Koreya xalqının həyat şəraitini yaxşılaşdırmaq üçün nüvə inkişafını dayandırmağı və nüvəsizləşdirmə yoluna qayıtmağı tövsiyə edib.

Daha əvvəl “Reuters” Şimali Koreya mətbuatına istinadən xəbər vermişdi ki, Şimali Koreya lideri Kim Çen In yeni qitələrarası ballistik raketlərin hazırlanması və taktiki nüvə silahlarının kütləvi istehsalına başlanılması barədə göstəriş verib.
 

Tərcümə: Nigar