Saakaşvilinin oğlu kömək istədi: "Ümid edirəm ki, atam  həbsdə ölməyəcək"

Gürcüstanın eks-prezidenti Mixail Saakaşvilinin ailə üzvləri Avropa Parlamentinin deputatları ilə birlikdə Strasburqda Avropa Parlamentinin binası yaxınlığında brifinq keçirib.

 

Oxu24.com xəbər  verir  ki,“Novosti-Georgia” yazır ki, iştirakçılar Gürcüstan prezidentinə və hökumətinə müraciət edərək, əllərində olan hüquqi imkandan  istifadə etmək və hər şeyin faciə ilə bitməsinin qarşısını almaq xahişi ilə müraciət ediblər.

 

Eyni zamanda Mixail Saakaşvilinin oğlu Eduard da kömək istəyib.

 

“Hər dəfə onu həbsxanada və ya klinikada görəndə görürəm ki, enerjili, iddialı, xarizmatik adam yavaş-yavaş yoxa çıxır.

Biz ailə üzvləri bundan çox narahat və əsəbiyik. Onun vəziyyətinin günü-gündən pisləşdiyini görürük.

Artıq 6 aydır ki, xəstəxanadadır, amma  ona lazımi qayğı göstərilmir və ona görə də vəziyyəti pisləşir... Və biz bu çətin dövrdə ailəmizə çarə tapmağa çalışırıq və həlli həm hüquqi, həm də mənəvi baxımdan çox sadədir – ona xaricdə müvafiq klinikada müalicə olunmaq imkanı verin... Vəziyyət çox ağırdır və nəsə dəyişməlidir... Ümid edirəm ki, atam Mixail Saakaşvili  həbsdə ölməyəcək."

Bir gün əvvəl məlum olub ki, Mixail Saakaşvili Fransa prezidenti Emmanuel Makrona məktub göndərib, məktubda Makrondan kömək istəyib və “ölmək üzrə olduğunu, vaxtının az olduğunu” qeyd edib.

“Mən bütün həyatım boyu Gürcüstanda və Ukraynada azadlıq və islahatlar uğrunda mübarizə aparmışam, Rusiyanın imperialist siyasətinə qarşı çıxmışam. Putin məni özünün əsas düşmənlərindən biri hesab edir. O, məni öldürəcəyinə açıq söz verdi. İndi onun şəxsi məhbuslarından biri kimi həbsdəyəm. Toksikoloqlar həbsxanada zəhərləndiyim qənaətinə gəliblər”, – məktubda deyilir.

Gürcüstanın eks-prezidenti prezident Makronun və Fransa xalqının köməyinə ümid etdiyini bildirib.

 

Tərcümə: Miri Məcidli