Moldovanın baş nazirinin müavini, xarici işlər və Avropaya inteqrasiya naziri Niku Popesku Rusiya ordusunun Dnestryanı bölgədən çıxarılmasına, eləcə də sovet dövründən qalan silah-sursat anbarlarının ləğvinə çağırıb.
Oxu24.com Ukrayna mətbuatına istinadən xəbər verir ki, bunu Moldova baş nazirinin müavini ATƏT Xarici İşlər Nazirləri Şurasının Polşada keçirilən iclasında çıxışı zamanı deyib.
"Rusiya silahlı qüvvələrinin qeyri-qanuni mövcudluğu Moldovanın suverenliyini və neytral statusunu pozur. Biz 1999-cu ildə ATƏT-in İstanbul sammitində Rusiya Federasiyasının öhdəliklərinə uyğun olaraq, Rusiya ordusunun Moldova Respublikası ərazisindən tam və qeyd-şərtsiz çıxarılmasını qətiyyətlə tələb edirik. ” - deyə Popesku bildirib.
O, həmçinin Kolbasna (Moldova kəndi) yaxınlığındakı sursat anbarına diqqət yetirməyə çağırıb. Baş nazirin müavininin sözlərinə görə, bu anbar bütün region üçün təhlükə yaradır və beynəlxalq səviyyədə tanınmış müvafiq prosedurlar vasitəsilə aradan qaldırılmalıdır.
Tərcümə: Nigar Oktayqızı
Oxu24.com
ŞƏRHLƏR