Ümumdünya ətraf mühit günü

13 Iyun tarixində Avropa Azərbaycan Məktəbinin ibtidai sinif şagirdləri Libraff Park Akademiyada Libraff və WWF təşkilatı tərəfindən təşkil olunmuş Beynəlxalq Ətraf Mühit Gününə həsr olunmuş tədbirdə iştirak etdilər.

Dünyada ətraf mühitin qorunması sahəsində aparıcı təşkilat olan WWF 100-ə yaxın ölkədə fəaliyyət göstərir. WWF təşkilatı təbii yaşayış yerlərinin qorunması və bərpa edilməsi, vəhşi təbiətin kütləvi şəkildə məhv olunmasının qarşısını almaq, dayanıqlı istehsal və istehlak bərqərar etmək istiqamətində fəaliyyət göstərir.

WWF təşkilatının nümayəndəsi Fuad Hətəmov planeti və ekosistemi mühafizə etmək üçün ətraf mühitin qorunmasının vacibliyi və ekoloji resurslardan səmərəli istifadə etmək barədə şagirdləri məlumatlandırdı.

Ətraflı

Daha sonra Libraff mağazalar şəbəkəsinin dizayneri və rəssamı Vüsalə Əliyeva gül və onun hissələrinin xətlərlə düzgün çəkilməsi prosesini əyani olaraq uşaqlara nümayiş etdirdi.

Uşaqlar təbiəti necə gördüklərini əks etdirən rəsmlər çəkdilər və işləri haqqında məlumat verərək şəkilləri izah etdilər.

Tədbir boyunca WWF təşkilatının maskotu olan panda şagirdlərlə bərabər oldu və onlarla maraqlı vaxt keçirdi.

Sonda WWF təşkilatının nümayəndələri uşaqlara ətraf mühitin qayğısına qalmaq barədə biliklərini artırmağa kömək edən kitablar hədiyyə etdilər.