Kremlin sözçüsü Dmitri Peskov jurnalistlərə açıqlamasında “Qazprom”un Bolqarıstan və Polşaya təbii qazın nəqlini rublla ödəmə sisteminə uyğun gəlmədiyi üçün tamamilə dayandırmasını qiymətləndirib.

OXU24.COM xəbər verir ki, Peskov Rusiyanın təhlükəsiz təchizatçı olduğunu və müqavilə öhdəliklərinə əməl etməyə davam etdiyini bildirib.

“Yeni ödəniş şərtləri, bu yeni metodologiyaya ehtiyac iqtisadiyyat və maliyyə sektorlarında atılan misli görülməmiş düşməncə addımlar nəticəsində yaranıb. Böyük həcmdə ehtiyatlarımızı blok etdilər, daha düzünü desəm, oğurladılar. Bütün bunlar yeni ödəniş sisteminə keçidi zərurətə çevirdi”, - Peskov bildirib.

Peskov Rusiyanın Avropa ölkələrini şantaj etməsi ilə bağlı ittihamları qəbul etmədiklərini söyləyib: “Bütün yeni şərtlər müştərilərə əvvəlcədən bildirilib”.

Kremlin sözçüsü digər ölkələrə təbii qaz nəqlindəki durumla bağlı sualı da cavablandırıb:

“Müştərilər təbii qazın ödəniş tarixi gələndə yeni sistemlə ödəməkdən imtina edərlərsə, prezidentin fərmanı qüvvəyə minəcək. Doğru ödəniş tədarükün davam etdirilməsi üçün əsasdır”.

Peskov Polşa və Bolqarıstana təbii qazın nəqlini dayandırmaq üçün lazımi hazırlıqları gördüklərini vurğulayıb:

“Hər şeyi hesablamışıq, bütün riskləri qabaqcadan nəzərə almışıq və ehtiyat tədbirləri görmüşük. Kimin razı olub-olmamasına gəlincə, bilirsiniz ki, prezident həmsöhbətlərinə dəfələrlə praktiki olaraq heç nəyin dəyişmədiyini açıqlayıb. Yeganə yenilik “Qasprombank”da iki hesab açmaq tələbidir. Hər hansı bir problem və ya itki, məzənnə fərqinə görə qiymət dəyişikliyi yoxdur”.