Ulupınar mahalının Qaradərə bölgəsində dağda yaşayan Mehmet Çabuk adlı şəxs qeyri-adi həyatı ilə diqqət çəkir. Çabuk dərədə öz imkanları hesabına taxtadan tikdiyi, üzərini neylon örtüklə örtdüyü sığınacaqda yaşayır. O, 100-ə yaxın keçisinin yanından heç ayrılmır.

 2007-ci ildə bir gecədə 150-yə yaxın keçisi oğurlandıqdan sonra insanlardan üz çevirən Çabuk 17 ildir həftədə iki dəfə yemək alış-verişi istisna olmaqla, yaşadığı yeri heç tərk etmir. Onun yemək alış-verişi üçün piyada getdiyi yer dərədən  45 dəqiqəlik məsafədədir.

Gecələr keçiləri ilə yatan, səhər tezdən oyanan, ocaq yandırıb gül yığan, dərədə uzun-uzadı gəzən Çabuk onu ziyarətə gələn qohumlarına vəziyyətinin yaxşı olduğunu deyir.  

Vadidəki dərədə çimən, xarici dil bilmədiyi üçün zaman-zaman bölgəyə gələn turistlətlə işarət dili ilə ünsiyyət quran Çabukun sağlamlığı da diqqət çəkir. Belə ki, o, dərman istifadə etmir və gün ərzində cəmi 2 dəfə yemək yeyir. Çabuk, keçilərinin oğurlandığı vaxt stress keçirdiyi üçün təzyiq müalicəsi aldığını deyib. İndi təzyiqinin kifayət qədər nizamlandığını bildirib.

Çabuk, heç vaxt darıxmadığını deyib: "Səhərlər əllərimi cibimə qoyub buralarda gəzirəm. Darıxmıram, öyrəşmişəm. Keçilərim olmasaydı, burada 1 saat da qala bilməzdim. Allah nə versə, yeyirəm. Səhər yeməyində çay dəmləyib zeytun və çörəklə yedim”.

Heç vaxt evli olmayan Çabuk bundan sonra da yanında heç kimi istəmədiyini bildirib.