Britaniyanın aparıcı iqlimşünası, BMT-nin iqlim qurumunun keçmiş rəhbəri, professor Ser Bob Vatson bildirib ki, qlobal istiləşməni 1,5 dərəcə ilə məhdudlaşdırmaq hədəfinə çatmaq mümkün olmayacaq.

OXU24.COM  AZƏRTAC-a istinadən bildirir ki, onun bu xəbərdarlığı Avropa, Çin və ABŞ üçün həddindən artıq istilərin olduğu vaxta təsadüf edir. BMT bildirib ki, limitin aşılması milyonlarla insanı potensial dağıdıcı iqlim hadisələrinə məruz qoyacaq.

Dünya 2015-ci ildə Parisdə keçirilən BMT konfransında iqlim dəyişikliyi səbəbindən temperatur artımını sənayedən əvvəlki səviyyədən 1,5 dərəcə yuxarı məhdudlaşdırmağa cəhd etmək barədə razılaşdı. Bu hədəf iqlim dəyişikliyi ilə mübarizə üçün qlobal səylərin mərkəzinə çevrilib. İqlim alimləri illərdir hökumətlərə xəbərdarlıq edir ki, onlar öz ölkələrinin emissiyalarını bu hədəf daxilində saxlamaq üçün kifayət qədər səy göstərmirlər. Lakin BMT-nin iqlim elmləri orqanı olan IPCC-nin keçmiş rəhbəri kimi yüksəkvəzifəli bir alimin pessimist proqnozu təəccüblüdür.

Bob Vatson hazırda Böyük Britaniyanın "Tyndall" İqlim Tədqiqatları Mərkəzinin fəxri professorudur. O, əvvəllər BMT, NASA, Böyük Britaniyanın Ətraf Mühit Departamentində və Ağ evdə çalışıb və dünyanın ən qabaqcıl iqlim alimlərindən biridir. O jurnalistlərə müsahibəsində deyib: "Məncə, insanların çoxu qorxur ki, biz nail olacağımıza inanmadığım 1,5 dərəcə Selsi həddindən imtina etsək, fəlakət baş verəcək. Əslində, mən hətta 2 dərəcə Selsiyə nail olmaqdan çox bədbinəm və temperaturun daha yüksək olmasına icazə versək, hökumətlər gələcəkdə daha da az iş görəcəklər."

Alimin iqlim dəyişikliyi ilə bağlı fəaliyyətin vəziyyəti ilə bağlı şərhləri səmimidir və həmkarlarının çoxu onun 2,5 dərəcə Selsi və ya temperaturun daha çox yüksəlməsi qənaəti ilə razılaşmalı olacaq. Hökumətlərin istixana qazı emissiyalarının azaldılması ilə bağlı öhdəliklərinə əsaslanaraq, "Climate Action Tracker" qlobal temperaturun 2,7 dərəcə Selsiyə yüksələcəyini proqnozlaşdırır. Bu rəqəm dünya temperaturunun birbaşa ölçüsü deyil, Yerin uzunmüddətli qlobal orta göstərici ilə müqayisədə nə qədər isindiyini və ya soyuduğunun göstəricisidir və hətta kiçik dəyişikliklər də əhəmiyyətli təsirlərə səbəb ola bilər.

BMT-nin iqlim orqanı IPCC temperaturun 2 dərəcə Selsi deyil, hətta 1.5 dərəcədə qalmasının müsbət nəticələrini göstərib: dəniz səviyyəsinin yüksəlməsinə görə daha 10 milyon az insan evlərini itirəcək, su çatışmazlığı yaşayan insanların sayı 50 faiz azalacaq və mərcan rifi itkisi 99 faizdən 70 faizə düşəcək.

Bob Vatson bununla bağlı deyib: "Əsas məsələ odur ki, biz cari emissiyaları ən az 50 faiz azaltmalıyıq. Lakin problem ondadır ki, emissiyalar hələ də artır. Hədəflər müəyyən etmək kifayət deyil və ölkələr onları həyata keçirməlidir. Hətta Böyük Britaniya kimi həqiqətən də yaxşı hədəfi olan hökumətin belə bununla bağlı siyasəti yoxdur, bu məqsədlərə çatmaq üçün maliyyə vəsaiti də çatışmır".

Britaniyalı ekspert: Qlobal istiləşməni 1,5 dərəcə Selsi səviyyəsində saxlamaq mümkün olmayacaq