Rusiya-Azərbaycan sərhədində nə baş verir? - AÇIQLAMA

Rusiya yüklərin daşınması üçün nəzərdə tutulan Gürcüstanla sərhəddə yerləşən Yuxarı Lars keçid məntəqəsini bağlamağa hazırlaşır.

Oxu24.com Rusiya mediasına istinadən xəbər  verir  ki,  keçidin  bağlanmasına  səbəb məntəqənin infrastrukturunun yenidən qurulmasıdır.

Rusiya tərəfi təmir işlərinə martın 13-də başlamağa hazırlaşır: Yuxarı Larsın  işinin bərpası noyabr ayına qədər təxirə salına bilər.

Yük sektorundakı mənbələr bildirirlər ki, keçid məntəqəsinin bağlanması regionun nəqliyyat və logistika sektorunda problemləri daha da dərinləşdirə bilər.

Artıq son günlər sərhəd-keçid məntəqəsində uzun növbə yaranıb. Buna səbəb hava şəraiti və Rusiya Fövqəladə Hallar Nazirliyinin yolda hərəkəti məhdudlaşdıran qərarıdır. 

Yerli media  yazır  ki, bu qərardan sonra  Rusiya-Azərbaycan sərhədində yük maşınlarının uzun növbələri daha da artacaq

Rusiya tərəfi bildirir ki, təmir işləri ilə əlaqədar martın 13-dən Yuxarı Larsda hərəkət zolaqlarının sayı 11-dən 6-ya endirilib, yüklərin daşınması əks rejimdə başlayacaq.

Yəni, Gürcüstandan Rusiyaya yalnız yük maşınları buraxılacaq, Rusiyadan Gürcüstana yük daşıyan avtomobillər isə Azərbaycanla sərhəddə yerləşən Yaraq-Kazmalyar və Tahirkənd-Kazmalyar sərhəd keçid məntəqələrinə göndəriləcək.

Bu səbəbdən də Rusiya-Azərbaycan sərhədində yük maşınlarının uzun növbələrinin daha da artacağı gözlənilir.

Yaraq-Kazmalyar sərhəd-keçid məntəqəsinin buraxılış qabiliyyəti sutkada maksimum 200 ağır avtomobil təşkil edir və hazırda uzun növbələr yaranıb.

Nəticədə Rusiyadan, o cümlədən Azərbaycana daşınan mallar gecikir, nəqliyyat xərcləri artır. Ekspertlərin fikrincə, bəzi xaricdən gətirilən malların bahalaşmasının səbəblərindən biri də budur.

 

Tərcümə: Miri Məcidli