Birinci qəbulda qayda pozan abituriyentlərə inanılmaz cəza - böyük narahatlıq var...

Elçin Əfəndi: "2-ci imtahandakı pozuntuya görə ilk cəhdin nəticələrinin ləğv olunması ədalətsizlikdir"
img
Dövlət İmtahan Mərkəzinin yaydığı məlumata əsasən, ali təhsil müəssisələrinə qəbul imtahanlarının ikinci cəhdində qayda pozan, o cümlədən üzərində mobil telefon aşkarlanan abituriyentin birinci cəhd imtahanında topladığı nəticəsi də ləğv olunur. Məlumat üçün bildirək ki, II və III ixtisas qrupları üzrə 6-7 iyulda keçirilən imtahanlarda iştirak edən abituriyentlərdən 12 nəfəri qaydaları pozduqlarına görə imtahandan xaric olunub və nəticələri ləğv edilib. Bu qərar isə cəmiyyət tərəfindən heç də müsbət qarşılanmayıb. Belə ki,  birinci cəhd imtahanında abituriyent heç bir qayda pozuntusu etmədiyi halda onun nəticələrinin ləğv olunması narazılıqla qarşılanır.

"Bu mərhələdə müəyyən qeyri-leqal yollara əl atırıqsa, bunun gələcək üçün hansı fəsadlara yol açacağını görmək elə də çətin deyil"

Məsələ ilə bağlı fikir bildirən təhsil eksperti Elçin Əfəndi qeyd etdi ki, 2-ci imtahandakı pozuntuya görə ilk cəhdin nəticələrinin ləğv olunması ədalətsizdir:

“Ümumilikdə, qaydaları pozanların cəzalandırılmasını ədalətsizlik hesab etmirəm. Çünki imtahanlarda abituriyentlərin öz bilik və bacarıqlarına görə qiymətləndirmə aparılır. Gələcəkdə ixtisaslı kadrların hazırlanması üçün qəbul imtahanları aparılır. Biz əgər bu mərhələdə müəyyən qeyri-leqal yollara əl atırıqsa, bunun gələcək üçün hansı fəsadlara yol açacağını görmək elə də çətin deyil. 2-ci imtahandakı pozuntuya görə birinci imtahanın nəticəsinin ləğv olunması isə müəyyən mənada ədalətsizlik hesab oluna bilər. Lakin bunun edilməsi də abituriyentlər üçün örnək olur. Çünki həmin abituriyentlər artıq özləri də bilirlər ki, ilk imtahanın nəticələri də ləğv olunur. Bu da digər imtahanlarda oxşar pozuntuya cəhd edənlərin sayının azalmasına təsir edir. Düşünürəm ki, buna ədalətsizlik kimi yanaşsaq da, ümumi prosedura sözün həqiqi mənasında ciddi təsir etmir”.