"Allahın razılığı olan işlərə can at, onu qəzəbləndirən məkanlardan və işlərdən uzaq dur."

Oxu24.com xəbər verir ki, bu gün hicri-qəməri tarixi ilə müqəddəs Ramazan ayının ikinci günüdür. Bu gün üçün nəql edilmiş və oxunması tövsiyə edilmiş duada hər bir bəndədən böyük Allahın razılığını əldə etmək tələb olunur.

Allahın öz bəndəsindən razı olması məsələsi Qurani-kərimdə ən böyük nemət kimi yad edilir. Elə Həzrət Məhəmməd (s) peyğəmbərdən də nəql edilmiş hədislərin birində “Əgər cənnətə getmək istəyirsənsə, Allahın razılığına səbəb olan işlərlə məşğul ol və Allahı qəzəbləndirən işlərdən uzaq dur” deyilir.

Ramazanın ikinci gününün duası belədir:

“Allahummə qərribni fihi ila mərzatik. Və cənnibni fihi min səxətikə və nəqimatik. Və vəffiqni fihi liqiraəti ayatik. Birəhmətikə ya ərhəmər-rahimin.”

Tərcüməsi:

“İlahi, bu gün məni öz razılığına yaxınlaşdır, qəzəb və intiqamından uzaq et. Sənin ayələrini (Qur-anı) oxumaqda mənə müvəffəqiyyət əta et. Sonsuz mərhəmətinə and verirəm, ey rəhmlilərin ən rəhmlisi!”

Qeyd edək ki, hər il olduğu kimi bu il də İnterAz televiziya kanalı və SalamNews İnformasiya Agentliyi Ramazan ayı münasibətilə ənənəvi aksiyanı davam etdirəcək. Aksiyanın şüarı "İsrafçılıq və dəbdəbədən uzaq, sadə iftar süfrəsi"dir. Eyni zamanda, aksiya imkanı olan hər kəsi ehtiyac duyan insanlara kömək etməyə dəvət edir.