Lakin gülməyi unutdum Ana!   

Gənclik gözəl məqamdır. Bəlkə də, ömrün ən xoşbəxt, bəxtəvər, rahat və qayğısız çağıdır. Üstəlik də, yaxşı ailən varsa. Nümunəvi ata, anaya sahibsənsə. Bu, ən böyük şansındır. Adam ürəkli olur. Elə bilirsən, heç kimin, heç nəyin sənə gücü çatmaz. Hər şeyə isə sənin əlin çatar. Çünki arxanda dağ kimi valideynlərin var. 

Mənim gəncliyim çox şux, xoşbəxt və şən olub.  Deyib-gülməyi, zarafatı sevmişəm. Əlbəttə, qədərində. Özümə hörmətlə yanaşı, kimin qızı olduğumu da unutmamışam. Hər addımıma fikir vermişəm. Amma evimizdə başqa bir qız olurdum. Hay-küylü, güləndə az qala divarlar silkələnirdi. O qədər ürəkdən gülürdüm. Bir müəllimim vardı. Rəhmətlik deyirdi, "Ramidə kişmişi gülür. Elə ürəkdən gülür, adamın eyni açılır". 

Ancaq evdə həmişə bu gülmək üstündə danlanırdım. Anam deyirdi ki, "Olmaz belə gülmək. Qız uşağısan. Güləndə yeddievli qonşu eşidir. Ayıbdır. Ərə getdiyin yerdə üç gün sonra, gətirib, üstümüzə atacaqlar ki, belə gülmək olmaz". Bu mənim alyanaqlı, anamın, sonamın sözləri idi. 

Əlbəttə, anam istəyirdi ki, mən hər şeydə nümunəvi olum, xoşbəxt olum. İndi, mən də eynilə qızıma qarşı eyni düşüncədəyəm. 

Amma məsələ ondadır ki, anam deyən kimi ailə də qurdum, oğul uşaq sahibi də oldum, onları ürəyim istəyən kimi tərbiyə edib böyütdüm. 

Lakin gülməyi unutdum Ana! 

Sənin böyütdüyün o ötkəm, şıltaq, şən qızdan əsər-əlamət qalmadı Ana! 

Mən hər şeydə nümunəvi olmağa çalışdım. Müəyyən qədər nail də oldum. Bəlkə də, lap çoxunu əldə etdim. Amma gözlərimdəki o işıq söndü, çöhrəmdəki təbəssüm yoxa çıxdı Ana! 

Daha ürəkdən gülə bilmirəm. Gülməyi unutmuşam Ana! 

Nə vaxt ürəkdən güldüyüm belə yadımda deyil. Biraz güləndə canım, ruhum ağrıyır Ana! 

Bilmirəm, bəlkə də, çiyinlərimdəki yükün ağırlığı, ürəyimdəki nisgilin nəticəsidir. 

Bilmirəm, heç nə bilmirəm. 

Amma bircə şeyi bilirəm, o gülüşümü axtarıram Ana! 

Tapa bilmirəm, itən gəncliyim, əriyən gözəlliyim kimi o da yox çıxıb. O tərəflərdə görsən, de ki, " səni axtaran, arzusunda olan var". 

   Ramidə Yaqubqızı

Həmçinin oxuyun

Bakıda faciə: 4 ölü,1 yaralı var -VİDEO

Qaz və işıq limitləri ilə bağlı YENİ TƏKLİF: Xüsusi kartlar verilə bilər

Prezident maaşlarla bağlı FƏRMAN İMZALADI

Prezident İlham Əliyev Putinə zəng edib